Da ka jingrwai ba kyrpang yn pynlong ki jaidbynriew Naga ban ai khublei ïa ka jingïatreilang ka sorkar jylla

Shillong, Naiwieng 14: Ki jaidbynriew Naga ha Shillong kin pynlong ïa ka jingrwai ban pynpaw ïa ka jingsngewnguh ïa ka jylla bad ki nongshong shnong jong ka Meghalaya na ka bynta palat shispah snem ka jingïadei ha ka pule puthi, ka kolshor, ka jingngeit bad ka imlang sahlang.
Kane ka jingai burom kaba la ai kyrteng ‘Khublei, Meghalaya: A Friendship Tribute Fellowship’ kan long ha ka 15 tarik Naiwieng ha Naga Community Hall, Nongrim Hills, Shillong.
Ïa kane yn pynlong da ka Naga Christian Fellowship Shillong bad ka Naga Elders Forum Shillong ryngkat ka phang, ‘Ka Burom ïa Ka Mynnor Jong Ngi, Ka Jingrakhe ïa Ka Mynta Jong Ngi, Ka Jingpynshlur ïa Ka Lawei Jong Ngi.’
Ka jingïalang ka thmu ban burom ïa ka histori ba ïasam lang, ban pynskhem ïa ka jingïadei bad ban ai mynsiem ïa ka jingïatreilang ha ka lawei na ka bynta ka jingroi bad jingsan lang.
Lyngba ka jingïalang lang, ka imlang sahlang kan pynpaw ïa ka jingsngewnguh kaba ïatylli bad kaba thikna sha ki nongshong shnong bad ka Sorkar Meghalaya na ka bynta palat shispah snem ka jingsngewtynnad, ka jinghikai bad ka jaka rieh. Kan wad ruh ban pynskhem ïa ka jingïatylli ha ka thaiñ da kaba pynskhem ïa ka jingïadei ha ka imlang sahlang bad ka jingïatylli hapdeng ki Naga bad ki jaidbynriew trai ri jong ka Meghalaya.
Ka fellowship ka rakhe ïa palat 100 snem jong ka jingïasam ïa ka histori, kaba sdang naduh ka matrik ba nyngkong jong ki Naga ha Shillong ha u snem 1918 bad ki pateng jong ki nongsdang Naga kiba la pule ha Meghalaya bad ki la leit ban ïalam ha Nagaland, Manipur bad shabar.
Ka burom ruh ïa ka pateng jingngeit kaba neh kaba pynïasoh ïa ki ar tylli ki thaiñ.
Ïa kane ka jingai burom yn pynlong da ka kynhun jingrwai jong ka Nagaland Madrigal Singers (TNMS), ka kynhun rwai jong ki samla pule ba la pyntbit bha na ki jaka pule jingrwai.
Ha kane ka janmiet yn pyni ïa ka jingrwai kynhun kaba pynïasoh ïa ki jinglong bapher bapher jong ki jaitbynriew Naga bad kaba rakhe ïa ka pateng jong ka thaiñ shatei lammihngi jong ka ri India. Kan kynthup ïa ki jingrwai madrigal ba rim, ki jingpynbeit jong ki kynhun jingrwai ba mynta bad ki sur tynrai jong ki Naga bad ki Khasi, ryngkat bad ka jingpeit bniah ïa ka histori shaphang ki nongsdang Naga ba nyngkong lyngba ka jingïathuhkhana ba paw bad ka jingrwai.