Shillong, Naiwieng 09 : Ka Synjuk jong ki nonghikai skul Deficit hapoh ka lama jong ka Khasi Jaintia Deficit School Teachers Association (KJDSTA) hynne ka sngi Nyngkong ki la shim ïa ka rai ban pynlong noh da ka jingïakhih naduh ka 11tarik mynta u bnai kum ka dak ka jingpyrshah halor ka jingkuman jong ka sorkar haba ïadei bad ka tulop bad kiwei kiwei ki jingsiew kiba ki dei ban ïoh.
Haba pynbna ïa kane, u President ka Synjuk u Babu Boswell Pala u la ong ba ïa kane ka rai ki la shim ha ka jingïalang jong ka seng kaba la long ha ka 07 tarik Naiwieng.
Shuh shuh haba kren bad ki lad pathai khubor u President u la ong ba ki la khot ïa kane ka jingïakhih namar ka jingshim por palat ban pynbeit ïa kine ki jingeh bad ki jingdawa kiba ki la ktah la slem bha ïa ki nonghikai Deficit.
“Ki mat jingdawa jongngi ki la shu sahteng khlem pynbeit,” u la ong da kaba bynrap ba kam shym la don satia ka jingpyntreikam ïa ka Centralised Provident Fund, NPS, ka jingbym pyntreikam ïa ka Scheme 2023, ka jingpynduh noh ïa ka Scheme 2026, ka jingbym pyntreikam ïa ka jingnoh synñiang CPF kaba 10 percent na ka tulop jong ngi, bad ka MACPS ruh ka dei kawei pat ka mat jingeh.”
U Babu Pala u la pynpaw ruh ïa ka jingsngewkhia halor ka jingkynnoh ba ka sorkar ka pyrshang ban pynrung ïa ka Special Provident Fund (SPF) sha ki deficit post bad ban pynkylla ïa ki deficit post sha ki composite grant post.
“Kawei pat kaba pynkhuslai shisha ka long ba don ki skul kiba khlem pynbna paidbah ïa ki deficit post,” u la ong.
Haba kren halor ka tulop, u President u la ong ba ki nonghikai kim pat ïoh satia kano-kano ka jingtip, watla mynta ka la poi sha ka 9 tarik Naiwieng.
“Wat ïa ka tulop jong ngi ruh, mynta ka sngi ka dei ka 09 tarik Naiwieng, hynrei ngim pat ïohsngew ei-ei. Ym don khubor satia shaphang ka tulop jong ngi, bad mynta ka la long kum ka jingïalehkai,” u la ong.
U la ong ba ka Tnad Pule Puthi, lyngba ka shithi kaba 08 tarik Risaw, 2026, ka la kular ba ïa ka jingpynkiew ïa ka DA sha ka 51 percent bad 53 percent, ryngkat bad ki jingsiew ba dang sah, yn pyllait shwa ban sdang ki shuti Puja.
“Ki shuti Puja ki la kut, hynrei ngim pat ïoh ïa kitei,” u la ong. “Ha ka 01 tarik Naiwieng, ki ophisar jong ka Tnad Pule Puthi ki la leh kumba kim tip shuh kaei kaba dei ban leh halor ka jingpynkiew DA.”
U President u la kynnoh ïa ka sorkar ba ka pyndonkam ïa ka jingïakren kum ka daw ban pynslem ïa ka jingai ïa ki hok jong ki nonghikai.
