Kumba ki la byrngem naduh kine ki taïew baladep, ki Nonghikai Skul Kontrak jong ki Skul LP ka sorkar kiba la shah weng kam na ka daw ba kim shym la pass ïa ka Eksam MTET, kine ki nonghikai ha ka 1 tarik u Nailar 2022, ki la mih shisha da kaba tur shuwa sha ïing u Myntri Rangbah ka jylla bad hadien pat ki la tur sa sha Secretariat, hynrei na ka liang ki bor pynïaid jong ka District ki la phah sangeh noh ïa ki ha ka jaka ïeng kali kaba don hajan Additional Secretariat, kaba long ka jaka ba la pynlong jingïakhih bad sahmiet ki Nonghikai Adhoc bad ki Nonghikai SSA.
Haba phaidien sha ka jingbuh ka sorkar ïa ki eksam ba ki nonghikai kidei ban ïaleh na ka bynta ban ïoh rung kam hikai, ha ka snem 2008-2009, la don ka eksam ba la tip kum ka School Eligilibilty Test (SET). Hynrei kane ka eksam ka la don ka dak thoh bria haba la don ki nonghikai kiba la shah kynnoh ba ki la pass da kaba phah pyndam sia lieh. Kane ka kam kala poi shaduh ka jingtohkit CBI bad la don palat spah ngut ki nonghikai kiba la shah pynduh kam syndon. Hadien kane pat, la thung sa ïa ka eksam Meghalaya Teachers Eligibility Test (MTET) bad la khot applikeshon biang na ka bynta ka kam hikai Lower Primary bad Upper Primary. Hadien baladep kane ka eksam, kiba bun ki nonghikai skul ba la thung kum ki nonghikai ba shipor da ka sorkar kim shym la pass ïa ka MTET bad kine ki nonghikai la shah weng noh na ka kam.
Kine ki nonghikai ki la mih ban ïakhih ban dawa na ka sorkar ba kadei ban thungkam biang ïa ki da kaba aidaw ba sha kiwei ki jylla ïa ki nonghikai kiba la don lypa ha ka kam, kim ju ai lang da ka eksam kiba ai ïa kiba dang shu dep pass ne kiba thmu ban rung kam thymmai sha ka kam hikai. Hynrei ki don la ka jong ka eksam kaba long kyrpang na ka bynta jong ki.
Ha ka jingpyrkhat briew, ka sngew don hi ka jingsngew synei ïa kine ki nonghikai kiba la hikai 8 ne 10 snem ba yn shu weng kam don kynsan kynsan ïa ki. Ki don napdeng kine ki nonghikai kiba lehse ki la heh ka rta na ka daw ba ki ïoh kam hikai ynda la kham heh ka rta. Ban ong ba kin ïaleh eksam biang sa shisien pat ka sngew eh na ka bynta jong ki. Kane kadei lehse ka daw ba kongsan ba kaba pynlong ïa kine ki nonghikai skul konkrah jong ka sorkar ban mih ban pynlong jingïakhih.
Ha kajuh ka por ruh ki don ki nonghikai kiba don pat ka sap kaba kyrpang kiba wat lada ka jingpule ne ka kyrdan jong kim kam dei kaba heh ne kaba biang, hynrei ki don pat ka la ka jong ka sap ban hikai bad ban pynsngewtuh ïa ki khynnah. La ju ïoh sngew ïa ka jingong ba “Kito te ka kyrdan pule ka la biang bha, hynrei kin da hikai pat ym sngewthuh”. Kane ka jia ha kylleng bad kiba bun ki khynnah skul bad wat ki para Nonghikai ruh kin pdiang ïa kane. Ka jingkylli kaba mih mynta ka long, la kine kine ki nonghikai kiba shah weng noh mynta, ki la pynmih pat ki khynnah skul kiba kumno ha kine ki 8 ne 10 snem ba ki hikai. Ïoh lehse kin don ki khynnah skul kiba lyngba ka jinghikai jong ki, ki la long skul kiba stad bad kiba la kiew sha ki kyrdan kiba sha jrong. Ei ban tip ïa kata?.
Hynrei haba pyrkhat pat na ka bynta kata ka jingnang jingstad kaba biang ne kaba paka ne kata ka quality education, donkam ban don ki nonghikai kiba la pyndep ïa ki jingpule ne ki test kiba biang ne kitta kiba ong kiba la long qualified. Lehse ka sorkar ka ladei ban leh khambha ban peit da ka jingslem ha kam hikai ne wat ka rta jong ki ruh ban phah ïaleh ïa ka eksam MTET, namar haba mih ki jingïakhih kiba kum kine, ka wanrah kaei kaei kaba jah burom ïa ka jylla, lada ki nonghikai ki ïai mih shi ïai mih sha surok ban pynlong ki jingïakhih.
Ka jingthung ka sorkar da ka Education Commission, lehse kan long ka lynti ïaid kaba thymmai kaba lada ka sorkar ka pynbun ïa ki dkhot kiba la dei ki nonghikai kiba la tbit bad kiba la experience bha ym ban pynbun da ki Politician, khlem pep kane ka Commission kan poi sha ka jingthmu kaba bha kaba lah ban rah ïa ka pule puthi bad ka kam hikai ha ka jylla hi baroh kawei.
