Kyrpad ki pulit ïa ki paidbah ban ai jingtip halor ka jingjia shah tynrah ka Scooty ha Mawlai Ïewrynghep

Shillong, Naiwieng 07: Ki pulit ka East Khasi Hills ki la kyrpad ïa ki paidbah ban ai ïa ki jingtip halor ka jingjia shah tynrah kali ha SD Khongwir Junction, Mawlai Ïewrynghep kaba la saphriang bha ha ki social media.
Katkum ka kyrwoh khubor jong ki pulit, la ong ba katei ka jingjia ka la jia ha ka 1 tarik u Naiwieng ha ka por kumba 11:22 baje eiei mynmiet, ha kaba kawei ka kali Bolero pick-up ka la tynrah ïa kawei ka kali ar shaka (scooty) kaba wan pyrshah bad ka la phet noh na katei ka jaka khlem sangeh. La ïohi ba u nongñiah katei ka thuk thuk u la ïeng biang ha la ki kjat ha ka video, hynrei ïa ka jinglong jingman bad ka jingheh jong ki jingmynsaw, lada don, ym pat lah ban tip.
Na ka liang jong ki pulit kila ïathuh ba ïa kane ka jingjia ym shym la pyntip sha ka Traffic Branch haduh mynta.
U Superintendent of Police u Bah Vivek Syiem u la kyrpad ïa u nongshah pynmynsaw/nongñiah arshaka lane ïa kino kino kiba don jingtip shaphang ka jinglong jong utei u nongshah tynrah ne ïa kino kino ki jingtip ba kin wan shakhmat bad ïasam ïa ki jingtip ba bniah sha ka ophis jong u SP/Mawlai Traffic Branch ha u number 69093 96417 / 600791 bad u nongpyniaid jong ka, khnang ba na ka liang ki pulit kin lah ban shim ia ki kam kiba long katkum ki aiñ.
Ki pulit ki la pynthikna ba yn buhrieh bha ïa ka jingithuh ïa kino kino ki briew kiba ai jingtip.