Shillong, Naiwieng 6: U Myntri Rangbah ka Jylla u Conrad K Sangma ha ka sngi Palei, ula plie ïa bun tylli ki projek kam pynroi bad buh ruh ïa u mawnongrim ban tei ïa ki projek bapher ha kylleng jong ka West Jaintia Hills district, kaba kynthup ïa ki surok, jaka ai jingsumar, jaka pule bad jaka ialehkai.
La synranlang ïa u Conrad Sangma, da u Symbud Myntri Rangbah ka jylla u Bah Sniawbhalang Dhar bad u Myntri ka koit ka khiah bad ka kam ialehkai u Bah Wailadmiki Shylla ha kaba u Myntri Rangbah ula pynlut por baroh shi sngi ban leit jurip ïa kylleng ki jaka ha kane ka district.
Haba kren ha ka jingialang plie ïa ka Block Integrated Development Complex ka Thadlaskein C&RD Block, ïa kaba la plie ryngkat lang bad u nongialam shnong u Bah Kwit Sari, u Myntri Rangbah ula pynpaw ïa ki 3 tylli ki paia jong ka sorkar ha ka rukom pyntreikam ïa ki kam pynroi.
Ki paia kiba nyngkong ki pynleit jingmut halor ki jingtei, kynthup ïa ki surok, skul, ki jaka ai jingsumar bad ki jaka ialehkai.
U Sangma ula ong ba jan kumba 70 percent jong ka jingpynlut ka sorkar kadei ha ka liang ialehkai ha ki katto katne snem kiba la dep bad kadei kaba la bthah ban tei ïa ki jingtei bapher bapher.
Ki paia ki ba-ar, kidei na ka bynta ka bha ka miat jong ki riewshimet bad ka jingai jingiarap ïa ki.
U Myntri Rangbah ula ong kumba T.400 Klur lah dep ban phah sha ki khynnah pule lyngba ki prorkam Scholarship ki bapher bapher.Ka jingai jingiarap da ka pisa ïa ki Self-Help Group kala kiew na ka T.50 Klur shaduh kaba jan kot ïa ka T.1,400 Klur, katba ki nongrep kila ioh pdiang jan kumba T.300 Klur lyngba ki scheme kum ka FOCUS+ bad CM ASSURE.
U paia balai, ula ong u pynleit jingmut ha kaban pynneh pynsah ïa ka jinglong tynrai, kolshor, ki jingleh tynrai kiba naduh mynshwa hapdeng ki jaidbynriew bapher bapher jong ka Meghalaya, khlem da kheiñ ïa ka jingngeit ne ïa ka thaiñ.
Ula banjur ruh ïa ka jingdonkam ban kynthup lang ïa ki khlieh nongsynshar bad ïa ki nongialam shnong ha ki sienjam kiba shim da ka sorkar ha kaba ïadei bad ki kam pynroi.
Ha ka liang ka koit ka khiah, u Sangma ula buh ïa u mawnongrim na ka bynta ban tei ïa ka hospital 100 jingthiah ha Ummulong, ha ka jinglut kaba kot T.53 Klur.La buh mawnongrim ban tei ïa ka Sub-Centre ha Ialong, Sabahmuswang bad Ksehrynshang, katba la plie paitbah pat ïa ka Madur bad ka Lad Mukhla Sub-Centres.
Ha ka pule puthi, la plie ïa ka jingtei ïa ka ïingskul jong ka Government Girls Higher Secondary School, Jowai bad la buh ïa u maw nongrim ban tei ïa ka ïingskul bathymmai jong ka Lower Primary School ha Mukhla Sohshrieh, Niriang bad Mokaswan.
Hapoh jong ka PWD (Roads), Jowai South Division, la plie paitbah ïa ka jingshna ïa ki surok, jingshna pynbha bad ki kam kiba ïadei bad ka jingkyntiew kyrdan kaba kot haduh 38.163 Km ha kylleng jong ka thain Jowai, Madur Thymme, Mukhla bad Niriang.
U Myntri Rangbah ula buh mawnongrim ruh na ka bynta ka 2.450-km Sabah Muswang ka surok shnong hapoh jong ka RIDF-XXX bad ïa ka surok kaba 4.085 km ha Khliehtyrshi hapoh jongka RIDF-XXXI.La buh ruh ïa u mawnongrim jong ka jingker ïa u pud u sam jong ka Thomas Jones Synod College, Jowai.
U Conrad Sangma ula leit ruh ban jurip ïa ka Iawmusiang Shopping Complex bad ïa ka Thadlaskein Hospitality Complex.
