30 sngi ai por ki 10 seng ïa ka sorkar ban pyntreikam noh ïa ka MRSSA, ILP, MIRSSMWA bad kiwei de

Shillong, Naiwieng 03: Ha ka sngi baar ki shiphew tylli ki sengbhalang kaba kynthup ïa ka FKJGP, HNYF, RBYF, JSU, GSU, AYWO, ADE, FAF, AAYWS, AHAM, ki la thaw ïa ka joint Co-Ordination Committee bad ki la leit ban ïakynduh ïa u Myntri Rangbah ka jylla u Conrad K. Sangma halor kawei ka phang kata ka long haba ïadei bad ka jingwan rung ki briew kiba nabar sha kane ka jylla.
Ha kane ka jingïakynduh ki shiphew tylli seng ki kwah ban ïakren bad ka sorkar halor ki mat kiba kila ai ha u snem 2013-2014 sha ka sorkar Meghalaya bad ha kane ka jingthoh kila pynpaw ïa ka jingsngewdiaw namar ba ym shym la pyntreikam ïa ki aiñ ban ïada na ka jingwan rung kyrthep ki briew kiba nabar.
Ha kane ka jingthoh kaba kila ai ha u Myntri Rangbah ka jylla kila buh ïa ka jingkylli bad ka jingpan ïa ka jingpynshai ba balei ym shym la lah ban pyntreikam pura ïa ka aiñ Meghalaya Resident Safety and Security Act 2016 (MRSSA) shaei ki jah ki jaka rung jaka mih bad la jia aïu ïa ka Meghalaya Identification Registration Safety and Security Migrants Workers Act (MIRSSMWA), ki la kren ruh haba ïadei bad u pud u sam bad ka Meghalaya Benamy Transaction Prohibition and Detection Act (MBTPDA).
Ha kane ka jingthoh ki la kren ba kitei ki aiñ ki long ban ïada ïa ki riewlum na ka jingshah klun ha ki briew kiba nabar la ka long na kiwei ki jylla ne na kiwei ki ri bad la kynnoh ba ka sorkar kam don ïa ka mon ban pyntreikam la ka long ha Khasi Hills ne Garo Hills ruh kumjuh bad kine ki shiphew seng kila ai por ïa ka sorkar lai phewsngi ban pyntreikam ïa kine ki ai lym kumta kin pynlong da ka jingïakhih.
U Bah Dundee Cliff Khongsit President ka FKJGP haba kren ha ki lad pathai khubor hadien ba la dep ban ïakynduh bad u Myntri Rangbah ka jylla u la ong ba ka jingïakynduh jong ki ka long ban ïakren halor ki mat bapher bapher kiba ki sengbhalang kila buh hakhmat ka sorkar naduh u snem 2014 khamtam eh haba ïadei bad ka Inner Line Permit, ka MRSSA namar ba ki sah ha ka um dum ym don ba pynshai.
Ha kane ka jingïakynduh na ka liang u Myntri Rangbah ka jylla u la ong ba ka sorkar ka dang peit bniah bad ha kajuh ka por ka JACC ka la ai por ïa ka sorkar 30 sngi ba kan jubab bad khamtam haba ïadei bad ka MRSSA i kumba ka pynsuki na ka liang ka sorkar wat la ka aiñ la dep ban pynlong naduh u snem 2016 haba ïadei bad kane ka aiñ u Myntri rangbah u ong ba ki wanrah ïa ka jingpynkylla namar kam don ïa kita ki kyndon ba ym lah ban kem ïa u briew ne ka briew bad u Myntri Rangbah u la ong ba un sa ïakynduh mynta u bnai bad ka kynhun ban ïakren kham bniah halor kine ki mat kiba kine ki seng ki la pynsngew sha u bad ban shim ïa ka rai halor kine kham kloi katba lah.