Halor ka Ropeway Project : Ki jaka kiba hap hapoh ka khyrnit kaba hynriew ka Council ka don hok ban pyntreikam ïa ki aiñ: Genl. Secy. UDP

Shillong, Naiwieng: U General Secretary ka United Democratic Party (UDP) u Bah T W Chyne u la ong ba uno uno u riew shimet ne ka Company bym dei hi ki trai jylla ne ki trai ri trai muluk haba ki wan ban leh ïa ki kam khaïi ne business ki hap beit ban ïoh ïa ka laisen khaïi bad ka kyndon ne ka Act ruh ka la kren da kaba shai.
Ïa kane u Bah Chyne u la kren haba ïadei bad ka jingsngew jong ka party haba ïadei bad ki kynrum kynram ka Shillong Peak Ropeway Project.
Haba kren sha ki lad pathai khubor u Bah Chyne u la ong ba ha kano ka rukom pat ba ka Executive Committee jong ka KHADC ka shimpor ne ka slem ban shimkam ïa kane, ka shong ha ka EC kumno ka pyrkhat bad ka pynïaid ïa ki kam.
“Yn hap ban pynthikna ba lada ka jingdon jingem ne ka nongkynti ka dei jong ka sorkar ngim don hok ban khang hynrei lada ka dei ka nongkynti jong ka District Council ka shong ha ka EC kumno ka pynshong ba ha kano ka nongrim lyngba ka aiñ ba ki leit khang ïa katei ka jingtrei jong ka Company ka Ropeway Project,” ong u Bah Chyne.
U la ïathuh ruh ba ha u pud u sam jong ka khyrnit kaba 6 ki don ruh ki jaka jong ka sorkar bad ha kine ki jaka jong ka sorkar kam mut ba ka council kam don ka bor ne ba kam treikam wat lada ka dei ka jaka sorkar.
“Laitnoh ki European Ward kiba ym hap hapoh ka jingpeit jong ka Council kam lah ban pyntrei ïa ki kam, hynrei lada ki dei kiba hap hapoh ka khyrnit kaba 6 ki aiñ jong ka council ki treikam,” ong u Bah Chyne.