Wat tang kawei ka kam pynroi ym don, sha u Modi phah dorkhas ka KJUPR lyngba u Lat bad ka BJP

Shillong, Naiwieng 3: Namar ka jingshah ieh khun swet ha baroh ki liang, la ka long ha ki MLA ne wat na ka sorkar jylla ka Khasi Jaintia United People Right’s Forum (KJUPR) mynta ka sngi kala shim ia ka sienjam da kaba phah dorkhar sha u Myntri Rangbahduh ka ri u Narendra Modi lyngba u Lat ka jylla bad ruh na ka State BJP Meghalaya.
Kane ka dorkhas la phah khang ba u Modi un tuklar lem lyngba ki kam pynroi jong ka sorkar kmie na ka bynta ka shnong Mowjem kaba hap ha West Jaintia Hills District namar ba kane ka shnong kaba la kynjoh shi spah snem ruh bad ki longing ruh kila poi haduh san spah tam hynrei wat tang kawei ka kam pynroi ruh kam don bad ki paidbah ki hap ban kynduh bun ki jingeh ha baroh ki liang.
Ïa kane ka jingleit ban aiti da ka Dorkhas la ialam da u Bah Reginal Shylla uba dei u President seng kmie bad u Bah Rehii Lyngdoh uba dei u President jong ka KJUPR, West Jaintia Hills.
Haba ioh ban aiti ia ka dorkhas sha u State President jong ka BJP u Rikman Momin ha ka jingdon lang u Bah M Kharkrang uba dei u nongai ktien ka party, kila pynpaw ba ki donkam ban leit jngoh shwa da la ki jong ki khmat ha kaba iadei bad katei ka shnong ha shwa ba kin phah sha u Narendra Modi ban iarap da ki scheme ka sorkar kmie ia katei ka shnong
Haba ïa kren bad une u nongthoh khubor u Bah Reginald Shylla u la ong, Ngi la wan buh ka dorkhas sha u Lat ka jylla bad kumjuh ruh ophis trei kam jong ka BJP kumba ngi la kular ïa ki nong shong shnong ka shnong Mowjem ban ïakhun bad buddien ïa ki jingeh.
“Ka Dorkhas ngi la phah sha u Myntri Rangbahduh ka ri u Narendra Modi la aiti lyngba u State President ka BJP u Rikman Momin bad ha ka jingïakren bad ka jingai jingmut ka long kaba sei soh” u la ong.
Na ka liang jong ka BJP kila shim ïa ka sienjam da kaba kin leit ban jurip hapoh ka shnong Mowjem bad kynduh ïa ki nong shong hnong bad ban wat ki lad ki lynti ban ïarap ïa ki lyngba ki scheme ka sorkar kmie namar ba ka seng ha ka jingiaid lynti ka kwah ban pynioh ïa ka hok jong ki nongshong shnong ka Mowjem, u la ong.
Na ka liang ka BJP kila pynpaw ba kin sa shim khia ïa kane ka dorkhas kumba ngi lah buh hapoh ka ophis jong ki.
“Ha ka pyrthei bad ka juk mynta kaba stad ngi iohi ba ka jylla Meghalaya bad ka ri India kadei ka ri kaba la kiew sted bha ki kam pynroi, hynrei hangne haka shnong Mowjem kawei ka kam pynroi ruh ym don bad kawei ka scheme sorkar kmie ruh ym don” ong u Bah Shylla.
Shuh shuh u la ong, Kane ka shnong kadei kaba la rim bha bad kaba la don da ki spah snem tam hynrei kawei ka kam pynroi ruh kam don (zero development) hapoh kane ka shnong.
“Ka surok ruh kaba sniew, ki jingshakri ha ka koit ka khiah ruh ym don, ka skul shnong ruh ym don skul sorkar ruh ym don hynrei tang ka skul baling bad kane ka shnong ka long ka shnong ba shah ieh bein bad rang ka bording ruh kim pat ioh bad ki paidbah ki hap ban shanniah ha ka solar bad kumjuh ruh ka umbam umdih ruh kim don” u la ong.
Halor kane u la pyntip ba ki paidbah kila kyrpad ïa ka sorkar ban thaw ki lad ki lynti ban ïarap ïa ki hynrei ka shu kut tang ha ka jingkyrpad bad ki khlem ioh eiei bad ki paidbah ki sahdien sah.
Halor ka koit ka khiah u Bah Shylla u la iathuh ba ki paidbah ki shim por haduh 45 minit ne shi kynta ban poi sha ki jaka ai jingsumar kiba jan tam eh bad kata ruh lada shim dawai na Health Centre ha Psiar bad lada leit shim dawai na Sahsniang bad Laskein ka dang shim por shuh shuh.
Kane ka shnong Mowjem ka hap hapoh ka Mookaiaw constituency ba mih khmat da u Bah Nujorki Sungoh kum u MLA bad na ka liang jong ka seng kala pyrshang ban ioh ia kren bad u hynrei khlem ioh lad namar ba um don hapdeng ka met kaba koit ba khiah.