Ha ryngkat ka jingshongshit kut ka 2nd NHM Sports Meet 2026 ba lai sngi ha South West KHD

Mawkyrwat, Risaw 18: Ka National Health Mission (NHM) ka la ïoh ban pynkut noh ïa ka lympung ïalehkai kaba shi sien shi snem ba la tip kum ka 2nd National Health Mission Sports Meet 2026 ba la pynlong lai sngi lynter halor ka phang pdeng, “Wellness Through Sports, Service Through Health”, ha South West Khasi Hills District, Mawkyrwat.
Ha kine ki lai sngi haba kheiñ kyllum baroh ki nongwan ïashimbynta na ki 7 tylli ki district hapoh ka Khasi & Jaiñtia ki don haduh 169 ngut ki nongwan ïashimbynta ha ki jait jingïalehkai bapher bapher naduh ka Basketball, ka Futsal, ka Football, ka Tug of War, bad ka Athletics ba kynthup ïa ka 100 meter bad ka Relay 4×100 meter.
Ka kynhun ba rah ïa ka nam lahduh ha kane ka 2nd National Health Mission Sports Meet 2026 napdeng ki kynhun baroh ka dei ka South West Khasi Hills District ha kaba ka la ïoh haduh 975 poiñ, ba ar ka West Khasi Hills District ka la ïoh 925 poiñ bad ba lai dei ka ka East Khasi Hills District ka la ïoh 350 poiñ.
Haba phai pat ha ki nongjop ha ki jingïalehkai, ha ka Basketball jong ki shynrang bad kynthei ïa ka nam jop la rah da ka West Khasi Hills District Team ha kaba ki shynrang ki la ïoh 23 – 4 poiñ pyrshah ïa ka East Jaiñtia Hills District Team bad ki kynthei ki la ïoh 19 – 3 poiñ pyrshah ïa ka East Khasi Hills District Team.
Ha ka Futsal ka South West Khasi Hills District Team ka la jop pyrshah ïa ka East Jaiñtia Hills District Team da 2 – 0 kol lyngba ka Tie Breaker.
Ha ka jingïakop mareh ba 100 Meter (Above 40) jong ki shynrang la jop da u Diktar Wanniang, ba ar u William Nongkynrieh bad ba lai dei u Remfelix Talang. Katba ki nongjop jong ki kynthei pat dei ka Aidaboklin Lyngkhoi, ba ar ka Dr. Fulbi Nongsiej bad ba lai ka Pearlyjones Laloo.
Nangta, ki nongjop ha ka 100 meter jong ki kynthei dei ka Steffi Nongtri, ba ar ka Banisha Snaitang bad ba lai dei ka Ribanylla Lyngdoh Nonglait. Katba ki nongjop jong ki shynrang dei u Siewdorlang Lyngdoh, ba ar dei u Bonstar Thongni bad ba lai dei u Regan Girod. Ha ka Relay 4×100 la jop da ka South West Khasi Hills District Team kynthup ïa ki shynrang bad kynthei.
Ha ka jingïakop tan tyllai la jop da ka West Khasi Hills District kynthup ïa ki shynrang bad kynthei bad ha ka jingïalehkai kynjatbol jong ki shynrang ïa ka nam jop la rah da ka West Khasi Hills District Team ha kaba ka la thep da 4 – 3 kol pyrshah ïa ka South West Khasi Hills District Team lyngba ka Tie Breaker.
U kongsan ha kane ka sngi u dei u bah B. Kharjana, Additional Superintendent jong ki Pulit ka South West Khasi Hills District, ka Dr. C. Lamin, District Medical & Health Officer, South West Khasi Hills District bad u Dr. W.L. Nary, MCH, Shillong kum ki symbud kongsan, ha ryngkat ka jingdonlang u bah Kordor Lyngdoh, General Secretary, NEAM, u bah Hiporly Talang, Vice-President, DEC, East Khasi Hills-cum-Sports Organising Secretary, K&J, u bah Skhemboklang Marbaniang, Secretary, District Executive Committee (DEC), South West Khasi Hills, u Dr. Victorius K. Syiemlieh, President, District Executive Committee (DEC), South West Khasi Hills lem bad kiwei de.