Jowai Naitung 31: Ka Raliang Elaka Arts & Culture Organisation, Elaka Raliang ha kane ka sngi saitjaiñ kala pynlong ïa ka tamasa ‘Iadaw Masi Rong’ kaba shisien shisnem ha Madan Pamsna Laskeiñ West Jaiñtia Hills District.
‘Ïa kane ka (Iadaw Masi Rong) la ju pynlong naduh ki por jong ki longshwa mynshwa hadien bala pyndep ïa thung ka tep bad da ka jingkyrmen ban ïoh ïa u kba u khaw uba bha ba miat bad ban biang ka kamai kajih ba baroh ki liang’.
La sdang ïa ka prokram naduh ka por 10 baje mynstep ha kaba la don shwa ka jingleh niam da ka suit ka shor ba la lam khmat da u Dolloi, u Pator, ki Ynniaw Waheh, ki Waheh Shnong, ki riew rangbah ryngkat i ‘Pyrnah’ ban wan rah da u Waheh Shnong Nongkynrih.
U ma L. Lamin uba dei u District Transports Officer ka East Khasi Hills District ula long kum u kongsan jong kane ka sngi uba la pynher ïa ka lama jong ka seng, haba kren u ai ka jingïaroh ïa ka Raliang Elaka Arts & Culture Organisation kaba la lah ban pynlong biang ïa kum kane ka tamasa hadien 2 snem ka jingwan lynshop jong ka khlam Covid-19.
Shi bynta na kane ka sngi Tamasa ula kyntu ïa ka Elaka ba kan pynban noh kum ka sngi ba kyrpang ne ka ‘Elaka Day’ namar ha kiwei de ki jait niam ha kylleng ka Ri ki ju don la ki jong ka sngi kynpang, ha ka juh ka por kan long kum ka lad ban pynsngewthuh ïa ki khun ka Elaka ba kin pynneh pynsah ïa ka riti ka dustur, naduh ka rukom rep ka rukom riang, ka jingbat ïa ka khyndew ka shyiap bad ha ka liang ka shongkha shongman.
Kane ka ‘Iadaw Masi Rong’ ka long kaba ïapher lada ïa nujor bad ka jingïatur Masi ha ki Fate da kaba thong pisa, ong u ma Lamin bad kane ka ‘Iadaw Masi Rong’ la pynlong shi bynta na ka lehniam leh rukom ban sakhi ruh ïa ka bha ka miat jong u kba u khaw. Kumta u kyntu ïa baroh ki khun ka Elaka ban kin wan ïashim bynta ha kum kane ka Tamasa.
La ïoh ruh ka jingkren ha kane ka sngi da u Dolloi ka Elaka Raliang ma C. Lyngdoh, u Waheh Shnong ka Mootyrshiah B bad ki kyntien ai khublei da u ma Rancha Lyngdoh ha jingdonlang ki nongshong shnong ka Elaka.
Hadien ka jingïalang la sdang ïa ki prokram ïalehkai bapher bapaher naduh ka jingïatur masi, ka jingïakop mareh, ka ïatan tyllai, ka phet nangsiang ne kaba mareh da kaba kit lang bad u skam kba bala shim bynta da ki 10 tylli ki shnong, ka jingsam khusnam sha ki samla pule kiba la poi shakhmat ha ka kyrdan SSLC bad HSSLC (Arts, Science bad Commerce). Kila don bun tylli ki dukan kiba wan die ïa ki jingbam bad ki mar rep ba bun jait ha kane ka Tamasa.
