Ai jingïaroh ïa ka jinglah jong ki nongdie doh ban pynitynnad watla ha i por iba lyngkot

Mawkyrwat, ‘Naitung, 31: Ka Deputy Commissioner jong ka South West Khasi Hills District hadien ba na ka liang jong ki nongot doh kiba ju shong die ha Ïew Mawkyrwat ki la pyndep ïa jingbthah na ka bor jong ka aiñ ba ki dei ban pynwan dur itynnad ïa ki dukan jong ki khamtam eh ha ka khuid ka suba ka la leit jurip da lade bad ka la ai ruh ka jingïaroh ïa ka jinglah jong ki ban leh ïa kata watla ka long ha i por iba lyngkot.
Ha kane ka jingleit jurip la synran ryngkat bad u Dr. Khongjoh lem bad ka ophis jong u Manager Sankur Ri Kynti Khaiñ Nonglang & Mawkyrwat Hat kiba dei peit ïa ka ïew Mawkyrwat ha kaba ki la leit ban jurip ïa ka basa die doh ha Mawkyrwat ha kaba ki la ïohi ba ka la long shisha kaba i khuid i suba hadien ba na ka liang ki nongshong dukan die doh ki la ai rong ai rup ha ka rukom kaba dei da kaba ki la pynbha shuh shuh ïa ki dukan.
Kumta ki la pynpaw ka jingsngewnguh ïa ki nongotdoh ba ki la kohnguh ïa kaei ba na ka liang ka sorkar ka la bthah ïa ki ban pynbha ïa baroh ki dukan die doh khnang ba kan long kaba i tynnad bad ban lait na ka jing-i-jakhlia bad lait ruh na shibun ki jingpang jingshitom.
Ban pynkhuid shuh shuh, ha kane ka sngi la wan ruh da ka kali Fire Brigade ban sait ne kynshait um ïa ki nala kiba don ki jinglang ki jakhlia ha kane ka basa die doh ha Ïew Mawkyrwat.
U Dr. E. Khongjoh bad u bah Y.G. Lyngdoh ha ka jingkren jong ki ki la pynpaw ka jingsngewnguh ïa baroh ki nongshong dukan die doh hapoh ïew Mawkyrwat ba ki la mih ryntieh baroh ban pynbha ïa kane ka basa die doh, kumjuh ruh ka jingsngewnguh ïa ka Deputy Commissioner, South West Khasi Hills District ba ka la wan ban jngoh hi da lade ïa kane ka basa die doh.
Na ka liang ka ki nongpeit ïa ka ïew napoh ka ophis jong u Manager Sankur Ri Kynti Khaiñ Nonglang & Mawkyrwat Hat ka kyntu ïa baroh ki nongshong dukan bad ïa kiba wan ïew ba kin sumar ban lehkhuid ymdei ban bret pathar ïa ki jaboh ki plastik bad kiwei de hapoh ïew namar ba kan long kaba itynnad bad kaba i khuid i suba ban kin dup lait na shibun ki jingpang jingshitom bad kyrmen skhem ba da ka jingïatreilang bad da kaba ki don ruh ka jingkitkhlieh da lade ïa lade kan wanrah ka jingkhuid jingsuba bad ka jingkoid jingkhiah ha ki liang baroh.