Nongstoiñ, Naitung, 31: Na ka bynta ban kyntiew ïa ki samla jong ka shnong ha ka jingïalehkai phutbol, ki nongpynïaid jong ka Steplanglur Social & Cultural Club ha ka sngi saitjaiñ ba la dep ki la pynlong ïa ka tamasa phutbol na ka bynta ki samla jong ki sawtylli ki kyntoit shnong ka Domsohjri, Jurïawthei, Mawmahrang bad ka Phudram bad ha ka sngi saitjaiñ ka 30 tarik Naitung la pynkut noh ïa katei ka tamasa phutbol.
Na kitei ki saw tylli ki kyntoit ka Jurïawthei bad ka kyntoit Mawmahrang ki la poi ha ka jingïaknieh ïa ka nam lahduh. Ha ka jingïakhun da ka tie breaker, ka Jurïawthei ka la pynliem noh ïa ka Mawmahrang da shi kol.
Ha katei ka sngi pynkut ïa katei ka tamasa phutbol u bah Fernandes Dkhar Youth President jong ka All India Trinamool Congress Meghalaya State Unit, u la shah khot kum u kongsan ban pynhap pyrda ïa katei ka tamasa phutbol. Shuwa ban sdang ïa ka jingialehkai, la pynlong ïa ka jingïalang ba lyngkot ha kaba la pynïaid da u bah B.Thongni president ka Club, ha ryngkat ka jingïadon lang jong u bah Dkhar kum u kongsan, u bah Handerson Kharbani kum u symbud kongsan, ki nongkitkam ka Club, u sordar shnong, ki riew rangbah, ki samla bad ki longkmie.
U bah Handerson Kharbani symbud kongsan, haba ai jingkren ha katei ka sngi u la ong ba ka jingïalehkai phutbol ha kine ki sngi kam dei shuh tang ka tamasa. Hynrei ka la kylla long kawei na ki lad ai kam ai jam ïa ki samla kiba don sap bad ka dei ruh ka lad kamai kaba heh tam na ka bynta kito ki smala ki bat bit bad kiba da thrang shisha ban poi sha ka thong kum ki rang ïalehkai phutbol.
U la kyntu ïa ki samla ba kim dei ban pynsep ei ïa ka por ha ki jingïalehkai ki bym ai jingmyntoi bad ki dei ban kiar raimaw rai dieng na kitei ki jait jingïalehkai, namar shisien ba la kyrni ha kiba kum kitei ki jait jingïalehkai, ka lawei jong ka jingim jong ki samla ka la jot thiaw bad ym lah shuh ban tei pat.
U bah Fernandes Dkhar haba kren kum u kongsan, u la ong ba kum ki samla ki dei ban don ka jingkut jingmut kaba skhem bad kiba trei shitom khnang ba kin poi sha ka thong ka jingjop. U la ong ruh ba ha ka jingïaid lynti kum ki samla ki don shibun ki dieng pynkiang jong ka jingim, hynrei ka jingïaishah bad ka jingïeng skhem ha la ka nongrim kan wanrah ïa u soh jong ka jingjop.
