Shillong, Risaw 16: U Nirmal Koch jong ka Tura bad Meghalaya uba dei u nongthoh poitri, nongthoh kot bad u stad wad bniah u la ïohpdiang ïa ka Sahitya Award 2026 da u Sahitya Charcha Kendra, Assam, ha ka jingithuh ïa u na ka bynta ka jingnoh synniang jong u ba la slem ha ka thoh ka tar bad ki jingtrei shitom jong u ban pynneh pynsah ïa ka ktien Koch, ka thoh ka tar bad ka ïawbei tynrai bad u la pynïasoh ha ka thoh ka tar bad ka riti ka dustur hapdeng ka jylla Assam bad Meghalaya.
La rakhe ïa katei ka sngi ha ka por ba ka la dap 9 snem ka tamasa Sharatar Duporiya, kaba la long ha Schemio Global School ha Azara ha ka sngi thohdieng. La pynlong ïa kane ka jingsam khusnam ha ka por 10 baje mynstep hapoh ka jingpynïaid jong u President, u Kumar Dipak Das, President ka Sahitya Charcha Kendra, Assam, kaba u la pyllait ïa ki kot, jingput jingtem bad ki poitri.
La donlang da ki riew pawkhmat ba kynthup ïa ka Nandita Devi, Dr Sarat Chandra Rabha bad u Dr Dipamani Haloi Mahanta bad u Koch u la ïohpdiang ïa katei ka khusnam Sahitya Award 2026, katba u Jayanti Deep ïa ka Rajen Pam Artist Award 2026.
U Koch uba dei na ka Ri Lum Garo, u la shem ïa ka jingthoh bad ka jingpynneh pynsah ïa ka ktien Koch, ka thoh ka tar, jingrwai tynrai bad kiwei kiwei. Katba ki jingshemphang jong u ki kynthup ïa ki jingthoh shaphang ka kynhun ka imlang sahlang, ka jingsdang bad ka jingdon jong ki Koch, lem bad ki jingrwai tynrai, jingshad bad ki tamasa.
Ha ki jingthoh jong u, u Koch u la pyni ïa ka jingïajan jong ka imlang ka sahlang bad ka mariang bad ka rukom long jong ka, kynthup ïa ka jingthung jingtep, jingpom dieng bad ki jingrwai Ri Lum. U la thoh ruh shaphang jong ki jingbam, jingdih bad kiwei kiwei ki riti ki dustur kaba u la lah ban ïarap ban pynneh pynsah ïa ka jingriewspah ka riti ka dustur jong ka imlang ka sahlang na ka bynta ka pateng ka ban sa wan.
Katba ki jingthoh jong u shaphang jong ka jinglong jingman jong ka imlang ka sahlang ki Koch ha ka Ri Lum Garo bad ka tamasa Pabuni ka la ïoh jingïaroh. Nalor jong ka jingshem jong u bad kiwei kiwei ki jingnoh synniang, u Koch u la don bynta ruh ha kaban bniah ïa bun tylli ki jingjia, ki kot magazine bad ka jingpyllait ïa ki kot sah jingkynmaw. Kala don ka jingïatreilang jong u ruh bad ki riewshemphang ba stad nabar ri ha kaban thoh bniah ïa ka ktien Koch sha ka ktien phareng bad kane ka long ruh kaba u la lah ban pynneh pynsah ïa ka ktien Koch.
Kane ka pyni ba u Koch u la lah ban kyntiew ïa ka jingsngewthuh ïa ka riti ka dustur bad ka jingïadei paralok hapdeng ka jylla Assam bad Meghalaya. Ïa katei ka tamasa, la pynïaid da ka Sahitya Charcha Kendra, Assam, Guwahati-17. Katba kiba don bynta lang ha kane ka tamasa ki long u Dr Paritosh Chakraborty bad u Dr Bhavesh Das.
