Nongpoh, Risaw 15: Ki pulit ka Ri-Bhoi ki la maham jur ïa ki paidbah ba kin kiar na ka jingpynsaphriang, phah sha kiwei pat ïa ka video kaba ïadei bad kawei ka khynnah rit kaba dang rit ka rta kaba la shah leh khlem-akor, lyngba ka whatsapp lane kino kino kiwei pat ki lad bad ki rynsan social media.
Ïa kane ka jingmaham la pynmih haba ïadei bad ka Nongpoh Women PS Case No. 64(10)2026, kaba la rejistar hapoh ki kyndon 3(a)/4/14(2)/15(1)(2) jong ka POCSO Act.
Ki pulit ki la maham ruh ba lada lap ïa kino kino ba ki donkti ha ka jingsaphriang ne sam ïa katei ka video kin ngat ha ka jingpynshitom katkum ki kyndon aiñ.
Ha kajuh ka por, la kyntu ïa u paidbah ba kin burom ïa kane ka jingmaham, naka bynta ka burom bad ka hok jong ka lanot, bad ban kiar na kino kino ki jingpynsaphriang kiba lah ban pynpaw bad ithuh ïaka dur jong ka lanot.
