Ïakhih ki nongñiah trok trai jylla ka Star Cement, khot ïakren ïa ki shaduh Shillong

Jowai, Risaw 15: Ka kynhun jong ki nongñiah trok kiba dei ki trai jylla, jong ka kharkhana dewbilat ka Star Cement Ltd, kaba don ha Lumshnong East Jaiñtia kiba la pynlong syndon da ka jingïakhih ba jai jai bad sangeh ban ñiah kali naduh ka 1 tarik u bnai Risaw shi bynta ban dawa ban pynkiew ïaka bainong ka bym pat urlong satia haduh mynta.
Hynrei mynta ka sngi 15 tarik Risaw na ka liang jong ka Star Cement kala phah ïa kine nongñiah trok ban wan shaduh Shillong ban ïakren pynbeit, ha kaba kine ki nongñiah trok ki la pynlong da ka jingïa kynduh lang ha Khliehtyrshi By-pass, na ka bynta ban ai ka jingshai halor kane ka jingïakhi ba jai jai ka jong ki.
Haka jingkren sha ki lad pathai khubor ki la pynpaw ka jingsngewsih kaba khraw ha kaba haduh mynta ka Star Cement kam pat pynïoh ïa ka jingdawa ka jong ki, kaba la long 15 sngi haduh mynta, namar ka jingsiew ïa ki kumba long mynta ka long kaba rit palat kaba ym ïahap shuh bad ka jingtrei jong ki.
Uwei na ki nongñiah ula ong la bun sien kila leit ban ïa kren bad ki bor pynïaid jong ka Company, hynrei haduh mynta kim pat leh ei ei.
Ha kaba kila pynpaw ruh ka jingsngewsih ba don katto katne ngut ki nongñiah trok trai jylla ki bym shym la ïasnoh kti lang ne ban ïadon bynta lang bad ka kynhun ha ka jingïadei bad kane ka jingdawa khnang ba ka jingdawa kan kham khlaiñ ne ïoh bor shuh shuh.
Ha ka jingïadei bad kine ki nongñiah kali ki bym shem la kwah ban ïasnohkti lang bad kane ka jingïakhih, na ka liang jong kiba pyrshah ki la mana ïa ki ba kim dei shuh ban kamai ne trei hapoh ka jylla, hynrei lada ki kwah ban kamai ki lah ban leit sha kawei pat ki jylla. Ki la ong ruh ba ka jingthmu jong ka Company ka long ban pynïapait iapra para ma ngi ki trai jylla kiba dei ki nongñiah trok jong kane ka company.
Ha kane ka sngi na ka Khasi Student Union (KSU) West Jaiñtia Unit ruh ka la wan ban kyrshan ïa kane ka kynhun jong ki nongñiah trok jong ka Star Cement kiba dei ki trai jylla.