Kyntu u Dy.CM ïa ki nongdie madan ban ïatreilang, dang pynkhreh ban pynkynriah na Jail Road

Shillong, Risaw 15 : Ka Sorkar Jylla ka dang ïai bteng ban pynbeit ryntih ïa ka rukom pynkynriah ïa ki nongdie madan na Jail Road sha ki jaka die mar ba la buh kyrpang, ong u Symbud Myntri Rangbah ba khmih ïa ka tnat Urban Affairs, u Bah Sniawbhalang Dhar da kaba kyntu ïa ki nongdie madan ban ai jingïatreilang bad ka sorkar.
Haba kren bad ki lad pathai khubor, u Bah Sniawbhalang u la pynpaw shai ba ki lynti ïaid kjat ki dei kyrpang na bynta ki paidbah ban ïaid kjat bad ym lah ban pyndonkam ïa ki kum ki jaka shong ne die mar, da kaba ban jur ba ka sorkar kam lah ban shah ïa ka jingpyndonkam bakla ïa ki surok bad ki lynti ïaid kjat.
“Ka lynti ïaid kjat ka dei ka lynti na bynta ki paidbah ban ïaid kjat, ym na bynta ban shong hapdeng. Kam dei tang ka kam kaba ïadei bad ka jaka ïaid kali,” u la ong haba jubab ïa ki jingkylli halor ka jingpyrshah jong ki nongdie madan ïa ka jingkynriah.
U la bynrap ba ka sorkar ka don ka jingkitkhlieh ban pyrkhat ïa ka jingmyntoi jong baroh ki paidbah, bad lada ym lah ban pynkhuid ïa ki surok, ka sorkar kan hap ban shim ïa ka jingkitkhlieh halor kata.
Haba batai ïa ka jingthmu jong kane ka sienjam, u Symbud Myntri Rangbah u la ong ba ka sorkar ka kwah ban pynlong ïa ka Shillong kaba khuid, kaba itynnad bad kaba don ka rukom treikam kaba ryntih. Kane, u la ong, “Ka ïahap ruh bad ka jingkyrpad jong ka High Court ban pynneh ïa ka jingkhuid jong ka nongbah”.
U Symbud Myntri Rangbah u la kubur ba ka jingkynriah ïa ki nongdie madan sha ki jaka thymmai ka lah ban wanrah ïa ki jingeh ha kaba sdang, khamtam ha ka jingïadie jingïathied bad ka kamai kajih. Hynrei u la pynpaw ka jingkyrmen ba ka kamai kajih jong ki kan sa wanphai biang katba ki paidbah ki nang tip ïa ki jaka ïew thymmai.
“Ngi pyrshang ban ai ïa ki ka jaka kaba kham bha. Hooid, don kiba kim kwah ban kynriah mynta. Ha kaba sdang, ka lah ban ktah ïa ka kamai kajih jong ki, hynrei suki suki kiei kiei kin sa bha,” u la ong.
U Bah Sniawbhalang u la pyntip ruh ba u la dep ban ïakynduh ïa ki nongdie madan bad kyrpad ïa ki ban ïatreilang bad ka sorkar, da kaba pynpaw ba ka jinghiar jong ka jingïadie jingïathied ha kaba sdang ka long kaba lah ban jia ha ka por ba pynkynriah ïa ki kam khaiï sha ki jaka thymmai.
Haba ïadei bad ka jingpynsngewthuh paidbah ïa ki jaka ïew ba thymmai, u la ong ba ka sorkar kan pynlong ïa ka jingpynbna paidbah, kumba la leh mynshwa haba pynkynriah ïa ki nongdie madan na Khyndailad sha MUDA.
“Ka jingsam cheque jong u Myntri Rangbah ha Barik ka pyni ba ngi don ryngkat bad ki nongdie madan. Ngi kwah ba kin lah ban bteng ïa ka kamai kajih jong ki, bad ngi kyrshan pura ïa ki,” u la ong.
Ha kaba ïadei bad ki Certificate of Vending (CoV), u la ong ba ka jingai ïa kine ki syrnod ka dang ïaid shakhmat katkum ki kyndon bad ki jingbthah ba la buh. Katkum ka jingong jong u, kito kiba la ïoh ïa ki syrnod ki la kynriah sha ki jaka ba la buh, katba ïa ki nongdie madan kiba dang ap ïa ki syrnod la nang pynïaid ïa ki jingdonkam lyngba ki bor ba dei peit.
U la pynpaw ba ka sorkar kan pyrshang ban pynbiang ïa ki jaka na bynta baroh katba lah, katkum ki kyndon ba la buh.