Shillong, Risaw 15: Ka Mawlai, ka kynhun ba dang shu rah nam lahduh ha ka Shillong Premier League 2026 kan aireng pyrshah ïa ka Nongkseh ha ka semifinal ba nyngkong jong ka SSA Super Cup 2026 ban long shibit janmiet ha SSA Stadium. Kane ka jingïakhun kan sdang ha ka por 5 baje janmiet.
La khmihlynti ba ka jingïakhun kan long kaba itynnad ha kaba baroh arliang kin kyrmen ban ïohrung sha ka phainal bad ban rah ïa ka khusnam ha ka jingïalehkai kaba khatduh.
Kum ka lahduh jong ka SPL, ka Mawlai ka la ïoh ban rung beit beit sha ka semifinal, ryngkat bad ka Shillong Lajong kaba la pyndep ha ka kyrdan ba ar lane runners-up, ka ban ïakynduh pyrshah ïa ka Meghalaya Police ha ka semifinal kaba ar lashai ka sngi Saitjaiñ.
Ha kawei pat ka liang, ka Nongkseh, ka la pyndep ha ka kyrdan ba lai ha ka samoi ïalehkai ba nyngkong jong ka ha ka SPL, bad ka la hap ban ïaid lyngba ïa ka jingïalehkai play off ha kane ka lympung Super Cup ban ïohrung sha ka semi final. Ha ka lynti sha ka semi final, ka kynhun ka la mad ïa ka jingïakhun kaba jwat pyrshah ka Sawmer ha ka sngi Ba-ar, ha kaba ka Nongkseh ka la shah lamkhmat ar sien shuwa ba kan jop ïa ka jingïalehkai da 4-2 kol.
Lah ban kdew ba tang na kane ka resol ka paw shai ba ka lympung ïalehkai knockout ka lah ban wanrah ïa ki jingïakhun kiba itynnad bad kaba pynkyndit, bad la khmihlynti ba ka jingïakhun kan kham itynnad shuh shuh na ka bynta ki nongkyrshan mynta ka sngi.
Ha ka por ba kine ki arliang mamla ki ïakynduh pyrshah ha ka SPL mynta u snem, ka jingïalehkai ka la paw kumba kan poi sha ka jingïakhaid tad haduh ba u Damanbhalang Chyne ka Mawlai, u la pynkhihjar na ka free-kick ha ka minit kaba 5 jong ka por pynjlan ha ka kylla miet ban khur pura ïa ki 3 poiñ na ka bynta ka kynhun, kaba la long ka jingjop kaba kongsan ha ka jingïakhun jong ka Mawlai ban rah ïa ka nam lahduh jong ka SPL.
Ka Nongkseh mynta kan ïoh ïa ka lad ban kput kylliang ïa katei ka jingshah rem, katba ka Mawlai kan kyrmen ban pynskhem ïa ka jaka jong ka kum ka kynhun ba khlaiñbor ha Shillong.
