Ha Keating Road bad SRGT ai jaka ka sorkar jylla ban pynïeng ïa ki kali kamai na Assam
Ym shah shuh ban pynïeng hajan Secretariat ne Nan Polok
Shillong, Risaw 14 : Ka Sorkar Jylla ka la rai ba baroh ki kali kamai na Assam kin pynieng noh ha ki ar tylli ki jaka ba la buh kyrpng kata kawei ha jaka pynieng kali jong ka MUDA kaba don ha Keating Road bad kawei pat ha SRGT.
Haba pyntip ia kane, u Symbud Myntri Rangbah ka Jylla uba khmih ïa ka tnat Transport, u Bah Sniawbhalang Dhar, u la ong ba ïa kane ka rai la shim ha ka jingïalang kaba la long ha ka sngi Balang bad ki ophisar ka tnat Transport.
“Ha kine ki katto katne taïew ba la dep, kane ka mat ka la sah teng. Ngi la ïakren shaphang ka jaka ban buh ïa ki kali kamai na Assam hapoh ka nongbah. Mynta ngi la rai ban pynïeng ïa ki ha ka thaiñ Keating Road, ha kaba don ka jaka pynïeng kali MUDA,” u la ong.
U la ong ba ki jingujor ki la nang bun halor ka jingpynïeng kali kulmar ha jan ka Secretariat, Wards Lake bad Pinewood Hotel.
“Ngi la ïoh ïa ka jingkyrpad na u Myntri Sorkar Assam, u Atul Bora, uba long u Chairman jong ka Committee na ka liang jong ki, bad ngi la ïoh ruh ïa ka jingtyrwa kaba an na ki nongpyniaid kali kamai na Assam. Mynta ngi la pynkut ïa ka jingïateh halor kane ka rukom pynïaid,” u la ong.
Katkum kane ka jingthmu, ïa ki kali rit yn pynïeng ha ka jaka MUDA, katba 10 haduh 20 tylli ki bus heh yn pynïeng ha SRGT.
“Kam itynnad haba ki pynïeng kali harud surok. Kane kan long khuid bad ryntih. Ki lah ban pynhiar ïa ki nongleit nongwan ha Secretariat ne Khyndailad, bad nangta leit pynïeng ïa ki kali ha ka jaka ba la buh kyrpang. Ki kali jong ngi ki trai shnong ki la don lypa ïa ki jaka pynïeng kali jong ki,” la ong u Symbud Myntri Rangbah.
Haba kren halor ka jingdawa jong ki nongñiah taksi na Khasi Hills ban ïoh jaka pynïeng kali ha Guwahati Airport, u Symbud Myntri Rangbah u la ong ba ka Jylla ka la ïakren halor kane bad ka Adani Group, kaba pynïaid ïa katei ka kad liengsuiñ.
“Ym pat dep ïa ka kam haduh mynta. Ynda la dep pynkhreh ïa ka jaka pynïeng kali, kin sa buh kyrpang ïa ka jaka na ka bynta jong ngi,” u la ong.