Shillong, Risaw 14: Ka jingpyntreikam ïa ka Khasi Social Custom of Lineage Act ka dang sahkut haduh mynta, ha kaba ka Khasi Hills Autonomous District Council (KHADC) ka kubur ba kam shym la lah ban thaw ïa ka Tribunal ba la bthah da ka amendment 2023.
Kane ka jingpdiang ka dei na ka EM ba peit ïa ka Law and Legal Matters ka kong Deity H Majaw ha ka kynta kylli jingkylli ha ka dorbar Tlang jong ka Council, ha ka jubab jong u nongïalam ka liang pyrshah u bah Titosstarwell Chyne.
Ka kong Majaw, ha jubab jong ka, ka la pynskhem ba ka Executive Committee ka pyntreikam ïa ka Khasi Hills Autonomous District (Khasi Social Custom of Lineage) Act, 1997 bad ki Rules 2007 ban ïada, ban pynneh pynsah bad ban kyntiew ïa ka Khasi matrilineal system.
Hynrei hadien ka la mynjur hapoh ka ïing dorbar ba kawei ka bynta kaba kongsan-ka Tribunal ban bishar ïa ki jingïakynad halor ka kur -ka dang sah khlem trei kam.
Haba u Bah Chyne u la kylli hato la thaw ne em ïa ka Tribunal bad mano ba dei ki dkhot jong ka, ka kong Majaw ka la jubab da kaba ong “Haduh mynta, ngim pat lah ban thaw ïa ka Tribunal.”
U Bah Chyne u la khot ïa ka jingpynslem kum ka ba ksngewkhia bha, da kaba kdew ba ka Act jong u snem 2023 ka pynbeit shai ïa ka Tribunal ban bishar ïa ki jingiakynad kiba ïadei bad ki kur.
Ka kong Majaw ka la pynshong nongrim ia ka jingpynslem namar ka jinglut kaba heh bad ki kyndon kiba pyrkhing bha.
“Ka jinglut kan long kaba heh bha.Ka Tribunal kan don bun ki dkhot bad ki riew shemphang.Ngi donkam la kumno kumno ia u nongiasaid ain uba la tbit 10 snem.Ki don shibun ki jingeh.Ngi dang ia pyrkhat bad ngin sa iakren kumno ban pyntreikam ia ka,” ka la ong.
Halor ka jingbynrap jong ka MDC ka Nongpoh ka kong Rona Khymdeit ha kaba ïadei bad ka Shaw Bhoi, ka kong Majaw mynta ym pat lah ban amend ha kaba iadei bad ka Shaw Bhoi namar ba dang pan kyrteng ban thaw ia ka committee.
Ka kong Khymdeit ka la kdew ba la pynlong ia ka committee ha kaba sdang jong u snem 2025 ban pynkylla ia ki kyndon kiba iadei bad u Shaw Bhoi hapoh ka Lineage Act.
Ka kong Majaw ka la jubab ba katba ka jingpynkylla ha u snem 2023 ka la kynthup ia ka Shaw Bhoi, hynrei mynta ki rangbah na Ri-Bhoi ki la dawa shuh shuh ia ki jingpynkylla.
“Ngi la thaw ia ka Committee.Ngi dang ap ia ka jingai jingmut jong ki riew shemphang bad ia ki kyrteng jong ki dkhot na Ri-Bhoi kiba tip ia ka ain bad ka dustur Shaw Bhoi.Dei na kata ka daw ba ka dang sahteng haduh mynta,” ka la ong.
Shwa ia kane, ka kong Majaw ka la pyntip ba ki don 113 tylli ki Seng Kur kiba la wan shakhmat ban register naduh ba la treikam ka amendment ne ka jingpynkylla 2023.
