Shillong, Risaw 13: Ki paidbah jong ka West Khasi Hills District ba kynthup lang ruh ïa ka South West bad ka Eastern West hadien 49 snem mynta kila ioh biang ïa u kyrtong MP na ka bynta ka election MP uba dei trai shnong na West Khasi Hills.
49 snem mynshwa dei u (L) Hopingstone Lyngdoh Nonglait uba la long teng kum u MP ka Shillong Parliamentary seat tang khyndiat por bad ha kane ka kynti kaba mynta ka West Khasi Hills kala ioh biang ïa u kyrtong MP na ka bynta ka election shiteng samoi.
Haba kren ha ka jingialang kaba la long ha ka shnong Markasa kaba hap mynta hapoh ka Eastern West District u Dr DRL Nonglait uba dei u kyrtong ka NPP na ka bynta ka election MP shiteng samoi u la ong “49 ne 50 snem mynshwa u la mih u Maieit Hopingstone, u la mih u wei u maw bad mynta hadien 49 snem la mih sa u wei pat u maw bad uta u dei u Bah Rock”.
U Dr Nonglait u la ong, Ngi la ioh shisien ban long MP tang khyndiat ki snem ïa u wei u maw u Hopingstone bad mynta hadien slem bah la mih briew biang nangne na West Khasi Hills bad hangne u ieng ha khmat jong phi sa u wei pat u maw bad uta u dei u Rock, Bakha Rock, u Bah Rock, Pakhnah Rock bad kiba la tymmen ki ong ïa nga u koh Rock”.
Shuh shuh u Dr Nonglait u la ong, “Ka shong ha phi ban leh kumno ïa une u maw la phi pyndonkam ne nai pyndonkam ka shong ha phi ki paidbah, ki para nong shong shnong nga don ha khmat jong phi bad phi tip ïa ka thymmei jong nga”.
U Dr Nonglait u la pynpaw ba ha ka por ba u (L) Hopimhstone Lyngdoh u ïa khun ïa ka election MP u ioh ka vote tang napoh ka West Khasi Hills ka long palat 93% tam na kiba wan thep vote u ioh u ma Hoping .
Ka Kong Beolinda L Nonglait kala kyntu ïa ki paidbah ka West Khasi Hills District bad ïa baroh ba kim dei ban pynlehnoh ei ïa kane ka kabu ba ki ioh kaba la wan biang ha ka District hadien 49 tylli ki snem ban ioh tang ïa u kyrtong MP.
