Khliehriat Risaw 14: Ka District Hub for Empowerment of Women (DHEW), East Jaiñtia Hills District mynta ka sngi ka la pynlong ïa ka prokram ba kyrpang na ka bynta ki khhynnah kynthei bad ka phangpdeng jong kane ka prokram ka ong “End Child marriage and Invest in Girls’ Right” kane ka phangpdeng ka kren shaphang ka bynta ban tehlakam ban pynduh pyndam noh ïa ka shongkha khynnah, ïa ka prokram la pynlong ha Auditorium Hall jong ka Don Bosco College, Byndihati.
Haba krenkum ka kongsan, ka Assistant Commissioner, East Jaiñtia Hills District, ka Dr Nidakyrkhu Dkhar, MCS, ka la kren halor ka jingdonkam ban don ka imlang ka sahlang kaba ïa ki khynnah kynthei ruh hap ban burom mar kumjuh bad ki shynrang da kaba khlem kheiñ poh ïa ki bad ka imlang ka sahlang kaba don ka jingkitkhlieh ban ïada ïa ki khynnah kynthei ha kaba ki dei hok ban ioh kajuh ka jingnang jingstad, kajuh ka ka jingsumar-sukher, ki juh ki hok longtrei ba ki dei ban ioh ha ka imlang ka sahlang. Shuh shuh ka kyntu halor ka jingdonkam ban kyntiew ïa ki khynnah kynthei ba kin ioh ïa ki jingaimynsiem, ki jingpynshlur ban pynpaw pyrthei ïalade, ba kin shim ïa ki rai na ka bynta ka lawei jong ki khlem kano kano ka jingsngewsheptieng ne kano kano ka jingartatien bad khlem kano kano ka jingshah peit ibeiñ, ka la ong ruh ba kane ka jingpynkupbor ïa ki khynnah kynthei kam shong eh tang ha ka sorkar hynrei ka shong ruh na ki longïing, longsem, na ki shlem ai jingnang jingstad, na ka imlang ka sahlang.
Ka kongsan ka kyntu ïa baroh ban don ka jingiatreilang ban tei ïa ka imlang ka sahlang kaba lait na kano kano ka jingshah peit ibeiñ ïa ki khynnah kynthei, namar ki khynnah kynthei ruh ki don ka hok ban pynurlong ïa kaei kaba ki buh thong ha ka jingim.
U Symbud kongsan, uba bat kum u District School Education Officer (DSEO), East Jaiñtia Hills District, u bah R. K. Diengdoh, u la ong ba ka jingnang jingstad ka dei kawei na ki atiar ba khlaiñ bor ha ka ban pynkupbor ïa ki khynnah kynthei, kaba lah ruh ban wanrah ïa ka jingkylla ha ka imlang ka sahlang ba ym dei ban peit ibeiñ ïa ki kynthei bad ki khynnah kynthei, ka dei ruh ka jingnang jingstad kaba lah ban pynlong ïa ki khynnah kynthei ba kin im laitluid ba kin don ka jingsngewskhem bad ba kin don ka jinglah ban shim ïa kano kano ka rai na ka bynta ka lawei jong ki.
U bah Diengdoh, u kyntu ïa ki khynnah kynthei ba ki dei ban long kiba khlaiñ kiba lah ban lait noh kloi na kino kino ki jingeh, ba kin phai kloi ïa ka bynta kaba dei ka thong ka jingim, u la ai mynsiem bad pynshlur ïa ki khynnah kynthei ba kim dei ban long kiba duh mynsiem, kiba duh jinngkyrmen haba wan ki jingeh, namar ka jingjop bad ban poi sha ka thong kam dei kaba lah ban pynurlong tang ha ka shimiet ne shitaiew hynrei donkam ban don ka jingtreishitom , ka jingkut jingmut kaba skhem bad ka jinglong ryntih ha kiei kiei baroh, u pynshlur ïa ki khynnah kynthei bad ki dei ban pynleit jingmut bha ha ki jingpule, ban ngeit ha ka jinglah jong ki bad ban iakhun ban poi sha ka thong.
Na ka liang ka Deputy Legal Aids Defence Counsel, DSLA, East Jaiñtia Hills District, ka kong K. Challam, ka la kren bad pyhshai halor ki jingpynshitom kiba ïadei bad kiba iatyngkhuh bad ka aiñ lada don kano kano ka jingiashongkha khynnah kaba ym pat biang ka kyrta, ka la kren ruh halor ka jingdonkam ka jingnang jingstad bad ong ba ka jingnang jingstad ka dei ka atiar kaba pynkupbor bad kaba wanrah jingkylla ha ka imlang ka sahlang, ka la kren bad batai bniah halor ki kam thombor pyrshah ïa ki khynnah kynthei bad ong ba ka aiñ ka don kaban ïada kyrpang ïa ki khynnah ba ka aiñ ka kren shai ruh halor ki hok jong ki khynnah ba ki dei ban don ka jingshngaiñ ha ka imlang ka sahlang, ka la pynshai shuh shuh da kaba batai ïa ki ain kiba katkum ki kyndon ne Section 498A jong ka Indian Penal Code bad Section 85 jong ka Bharatiya Nyaya Sanhita (BNS), lem bad ki kamsniew lane ki criminal justice system kiba ïadei bad kino kino ki jingeh kiba iatyngkhuh ha ïing ha sem lane ki domestic violence.
Ka kong Chalam ka la kren ruh ïa ki jingeh ba ki khynnah ki iakynduh kum ka cyber harassment bad ong ba halor kane ruh ka aiñ ka don kaba tip kum ka Information Technology Act,ba kynthup ïa ki kyndon lane Section 67, kum ka mutiar, ka pynshlur bad ai mynsiem ïa ki khynnah ba ki dei ban sngewthuh shai ba ki don ka hok bad dei ban burom ïa ka hok ki khynnah kynthei lym kumta kiba thew pyrshah ïa ki khynnah kynthei da kaba pynkheiñ ïa ki aiñ, kin iatyngkhuh bad ka aiñ bad ngat ha ki jingpynshitom kiba katkum ka aiñ.
Kiba la ai jingkren ki kynthup ruh ka District Social Welfare Officer (DSWO), East Jaintia Hills District, ka kong R. Bareh, u District Surveillance Officer, East Jaiñtia Hills District, Dr L. Sungoh, u District Hub for Empowerment of Women (DHEW), East Jaiñtia Hills District, u bah Phrangshwa.S.Lyngdoh bad kiwei kiwei.
Baroh kiba la wan sha kane ka prokram ki la shim ruh ïa ki kyntien jingkular ne ka pledge ba la ïalam da ka Gender Specialist, DHEW, East Jaintia Hills District, ka kong J. Darnei, ki kyntien jingkular ban pynkhlaiñ halor ka bynta ban ïada ïa ki hok jong ki khynnah kynthei bad ban kyntiew ïa ki ha ka imlang ka sahlang.
Kiwei pat ki bynta ha kane ka prokram ki kynthup ka jingrwai bad jingshad na ki khynnah pule jong Don Bosco College, Byndihati bad la don ruh ka jingsam prize sha kito ki khynnah kiba jop ha ki jingiakop Quiz bad Extempore Speech.
