Ïoh jinghikai ki samla pule ka St. Edmund’s College halor ka phang ‘stalking’ bad ‘cyberstalking’

Shillong, Risaw 14 : Ki khynnah pule jong ka St Edmund’s College ha ka Sngi Ba-ar ki la ïoh ïa ka jingpynsngewthuh halor ka jingshahbuddien ha ki briew khlem ka mon jong ki (stalking), ka jingbuddien lyngba internet (cyberstalking), ka jingïada ha ka jingpyndonkam ïa ki kor digital bad ki lad jingïada katkum ka aiñ, ha ka prokram pynsngewthuh paidbah kaba la pynlong da ka Meghalaya State Commission for Women ha ka jingïatreilang bad ka Women’s Cell bad Gender Champion Club jong ka kolej, ryngkat ka jingïarap jong ka National Commission for Women.
Haba kren ha katei ka prokram ha auditorium jong ka kolej, ka Chairperson jong ka Commission, ka Kong Ïamonlang M Syiem, ka la ban jur ïa ka jingdonkam ban pynsngewthuh paidbah halor ka jingïada ïa ki kynthei. Ka la batai ïa ka jingmut bad ki jait jingbuddien, bad ïa ka bynta jong kito briew kiba shah ktah, ki briew kiba leh ïa katei ka kam bad ka imlang sahlang.
U Principal ka kolej, u Sunil Britto, u la ai ïa ka jingkren pdiang, katba ka dkhot jong ka Commission, ka Jemimah Marak, ka la ai ïa ka jingkren ai khublei.
Ka jingshad drama kaba la pyni da ka Dramatics Club jong ka kolej ka la pyni ïa ka rukom ba ka jingbuddien ka ktah ïa ki samla kiba dang ha ka rta jong ki khynnah pule.
Ka bynta jong ka jingïakren kaba bniah, kaba la pynïaid da u Head jong ka Sociology Department, u Finley E J Syngai, ka la don lai tylli ki jingkren na ki riew shemphang.
Ka WPSI C Kharkongor na ka Cyber Crime Wing ka la kren halor ka jingshahbuddien bad ka jingbuddien lyngba internet. Ka la maham ïa ki khynnah pule halor ka jingpynbna palat ïa ki jingtip shimet ha ki social media, ka jinglong kaba don jingkitkhlieh haba pyndonkam ïa ki kor digital bad ki lad ban ïada na ka jingshah pynthut lyngba internet.
Ka Psychiatrist, ka D Khonglah na SANKER Hospital, ka la batai ïa ki jingktah ha ka jingmut jingpyrkhat kiba mih na ka jingshahbuddien, ki jingsngew kiba mih hadien ka jingjia kaba pynmynsaw bad ki rukom ban ïakhun ïa kine ki jingeh. Ka la ban jur ruh ïa ka bynta jong ki briew kiba lah ban shaniah bad ki kynhun jingïarap.
“Ka jabieng jong ngi ka lah ban pynkylla ïa ka rukom treikam jong ka, ngi lah ban pynbeit thymmai ïa ka bad ngi lah ban koit pat,” la ong ka Kong Khonglah, haba ka pyni ruh ïa ki rukom pynjah thait ïa ka met bad ka jingmut jingpyrkhat lyngba ka relaxation bad meditation.
Ka Legal Counsel, ka Kong Joy G Syiem, ka la batai ïa ki kyndon aiñ kiba ïadei bad ka jingbuddien bad ki rukom treikam jong ka Sorkar Jylla ban phah da ka jingujor. Ka la batai bniah ruh ïa ki hok jong kiba shah ktah, ki rukom ai jingtip sha ki bor ba dei peit, ki jingïarap bad ki lad jingïada, ryngkat bad ki kam kiba dei ban leh bad kiba ym dei ban leh da kiba shah ktah.
Katkum ka jingong jong ki bor pyniaid, kane ka prokram ka la ïarap ïa ki khynnah pule ban ithuh ïa ki rukom leh kiba long kum ka jingbuddien, ban bud ïa ki kyndon jingïada haba pyndonkam ïa ki kor digital, ban sngewthuh ïa ki jingktah ha ka jingmut jingpyrkhat bad ban tip ïa ki lad jingïarap katkum ka aiñ.