Ba shah leh beiñ ki Khristan, yn dang eh ka BJP ha Meghalaya, leit ïasoh 8 ngut ki MLA UDP, mih thma ktien ka BJP bad NPP

Hadien ba ki 8 ngut ki MLA jong ka seng UDP ki la leit ïasoh UDP, ka tdem jong ka jingphet seng sa ki MLA jong ka NPP, ka sdang ban per ha ka haw haw jong ka saiñ pyrthei ka Jylla bad kata ka long, ba ki MLA jong ka seng NPP, ki la pynkhreh ban ryngkoh dieng kper bad ïa katei ym shym la kren da ki rit ki ria ne ki ñiut ki ñier, hynrei la sei madan da U Bah AL Hek, uba dei u MLA ba rangbah jong ka seng BJP.
Halor kane ka jingkren, jong U bah Hek, la ïohi ba ki heh jong ka seng NPP, ba kynthup ïa U bah Prestone Tynsong bad U Ma Sniaw bhalang Dhar, ki la bitar lep bad kyntait war bad ka la mih ruh ka kyntien ‘Me’ bad kam lok; hynrei ka jingshisha, ka long ba ka NPP kam ïapher eiei ruh em na ka BJP, namar ba ki don lang ha kajuh ka kynhun jong ka NDA bad kumta ka rung ka mih kam da dei eh ban poi sha ka jingïabitar, namar ba ka NPP hi ruh kam lah ban im wat tang shisngi, khlem ka jingpyrsad mynsiem jong ka seng BJP bad ïa katei la ïohi, ba ha kine ki 8 snem ba ladep, ba u Conrad Sangma, u la pynlut por shaba palat ban leit rung ha man ki tyngkong jong ki myntri ka sorkar India bad katei ka pyni, ba um lah satia ban ïaid ban ïeng marwei, lada khlem ka jing btin lynti jong ki myntri na Delhi.
Na ka jingkren hi jong U Bah AL Hek bad sa ka jingleit jong ki 8 ngut ki MLA jong ka seng UDP, ki dak ki shin ki shai phyrnai bha, ba ka BJP, ka don tang kawei ka thong bad kata ka long ban jied ïa u kyrtong uba bit tam ban ïakhun ïa ka elekshon MP Lok Sabha bad ban pynjop donburom ruh ïa u bad lada katei ka jingthrang jong ki, kan urlong, kumta ka sorkar BJP, kan sa urlong noh hi ha kane ka jylla, lada jia ba kitei ki heh NPP, ki buhrieh katno katno ruh.
Ka NPP, ka lah ban sngewsih ne sngewbha, hynrei ka BJP, ka la dep rai ba ka sorkar ha Meghalaya, kan dei ka jong ka BJP, ha shwa ka elekshon MLA 2028 bad katei kan jia ha ki khyndiat bnai ki ban wan bad katei ka long ba kan theh puk puk ïa ki skhim pynroi sha baroh ki nongthep vote bad ba kan jop don burom ruh ha ka elekshon 2028.
Ai ba kitei kiba bitar bad kiba kyrkait kin nang ïa kyrhuh kum u laren sha madan madiah, hynrei ka BJP, ka la pynkhreh ïa la ki jong ki maw byrsiew jong ka, la kumba katto katne bnai ba la dep bad katei ka la urlong, ha kaba ka la ïoh khur ïa ki 8 ngut bad kumta kaba sah, ka long sa tang ba kan pyndap ïa ka 30 ngut kaba donkam ban ïalam ïa ka sorkar.
Kane ka buit treikam jong ka seng BJP ka la pynkhynñiuh ïa ka saiñ pyrthei ha kane ka jylla kaba watla bun na ki nongshong shnong kim lah ne kim kwah ban pynjop ïa ka BJP na ka daw jong ka jingtieng jong ka jinglah ban shah ban beiñ ki Khristan ha kane ka jylla kumba la ïohi shynna bad shai kdar ka jingleh donbor bad leh heh ki katto katne kiba kam ïalade ba kidei kita ki kynhun shitniam RSS kiba dei ki shnat treikam kum ka Bajrang dal bad ka Vishwa Hindu Parishad kiba la leh ki kam thombor sha ki jylla ri thor ba bun paid ki Hindu.
Kumba la ïohi ki kynhun Balang Khristan bapher bapher kiba don ha ki jylla ba la synshar da ka BJP kitei ki kynhun shitniam ki lah donbor ki leit pynthut ïa ki jingduwai, ki pharep khlem nongrim wat ïa ki skul Khristan da kaba kynnoh ba ka don ka jingshah pynkylla niam jubor bad bun ruh ki la shah set shah thep phatok bad la ïohi ruh ba wat ki bor pulit ruh ki hap don sha ka liang kitei ki kynhun shitniam.
Kumta kane ka jingleh jong kitei ki kynhun shitniam RSS ka la nang pynskhem ïa ka jingngeit jong ki nongshong shnong ka Jylla Meghalaya ba kin dang eh shisha ban pdiang ïa ka BJP ha kane ka jylla.
Kumta kumba ka long mynta kane ka jingleh jong kiwei pat ki briew sha kiwei pat ki jylla ka ktah ruh ïa kiwei pat sha kiwei ruh ki jylla. Kumba ka long mynta kane ka jingleh jong ki katto katne da kaba shim ïa ka aiñ ha ki kti bad da ka jingailad lang ruh ki bor ba khmih ïa ka shongsuk shongsaiñ ka ktah bha ïa ka synshar khaddar hapoh ka ri hi baroh kawei ha kaba kane ka donkam shisha ïa ka jingtuklar kaba mardor hapoh ka ri, kumba ka la paw mynta ba ka Cocroach Janata Party (CJP) ka la mih pyrthei mynta ban dawa pynbeit ïa baroh ki kynrum kynram bad kumjuh ki jingleh donbor jongno re jongno ne kano kano ka kynhun tang ban myntoi shimet jongno re jongno.