Ïasoi MoU ka DERT bad ka Bharti Airtel Foundation ban pynkhlain ïa ka jinghikai lyngba ka MTTA

Shillong, Risaw 10 : Ka sorkar Meghalaya lyngba ka tnad pule puthi bad ka Directorate of Educational Research and Training (DERT) mynta ka sngi ka la iasoi ïa ka Memorandum of Understanding (MoU) bad ka Bharti Airtel Foundation ban pynkhlain ïa ka jinghikai bad ka jingkiew ha ka kam jong ki nonghikai lyngba ka Meghalaya Teachers Training Academy (MTTA).
Ïa kane ka MoU la ïasoi ha ka jingiadonlang u myntri ka tnad pule puthi u Bah Lahkmen Rymbui, u Commissioner & Secretary u Vijay Kumar Mantri, Director ka DERT, ka kong J. U. Kharpuri bad ki heh ophisar ka tnad pule puthi.
Ka jingiatreilang ka thmu ban pynkhlain ïa ka jinglah jong ki nonghikai bad ki nongtrei ha ka pule puthi lyngba ka jingpynroi ïa ka jingtbit kaba bteng, ki rukom hikai ba mynta, ka jinghikai kaba pyndonkam da ka teknoloji bad ki prokram pynroi ïa ka jinglah.Kan kyrshan ruh ïa ka jingpynmih ïa ka kynhun hikai kaba kham tbit bad kaba la pynkhreh na ka bynta ka lawei kaba lah ban jubab ïa ki jingdonkam kiba kylla jong ki nongpule.
Ka Bharti Airtel Foundation ka wanrah ïa ka jingshemphang ha kaba kyrshan ïa ki tnad pule puthi ha ki bynta kiba kynthup ïa ka jingkyntiew ïa ka bor jong ki nonghikai bad ki nongialam skul, ki rukom hikai ba thymmai, ki lad jinghikai digital bad ka jingpynkhlain ïa ki jaka treikam.
Ka MoU ka pyni ïa ka sienjam kaba kongsan ban pynkhlain ïa ka Meghalaya Teachers Training Academy kum ka professional learning ba bteng, kaba pyndap ïa ki jingpyrshang ba dang ïaid jong ka Jylla ban kyntiew ïa ka jinglah jong ki nonghikai bad ki jingmih na ka jingpule.
Haba kren ha kane ka sngi, u Myntri ka tnad Pule Puthi u Bah Lahkmen Rymbui u la ban jur ïa ka jingdonkam ban ïai kyntiew ïa ka jingnang jingstad, ka sap bad ka rukom hikai jong ki nonghikai khnang ban ïaid ryngkat bad ka jingkylla stet jong ka pule puthi bad ka teknoloji.
Ka Sorkar Meghalaya ka la pynpaw ïa ka jingangnud jong ka ban ïatreilang bad ki paralok ban tei ïa ka bor hikai kaba tbit, kaba thymmai bad kaba la pynkhreh na ka bynta ka lawei, ha kaba kut kan ïarap sha ki lad jingpule bad ki jingmih kiba kham bha na ka bynta ki samla pule ha kylleng ka Jylla.