‘Ngi ladep ong Em te Em ban den projek bording ïa ka wah Khri’, sawa ka sur ki paidbah

Nongstoiñ, Risaw 09: Ki paidbah nongshong shnong na kylleng jong ka thaiñ Kyrshai kaba don ha khappud Meghalaya bad Assam, kata naduh ki shnong kiba don hapoh ka Jylla Assam bad Meghalaya kiba dei na ki jaidbynriew Khasi, Garo bad Rabha ki la ïa mih ryntihlang tang kawei ka sur ha ka jingïalang paidbah ba la khot da ka Assam & Meghalaya Joint Protection, ban dawa ban pynsangeh shisyndon ïa ka jingthmu ka Sorkar Assam bad Meghalaya ban tei ïa ka Purpose 55 MW Kulsi River Multipurpose Hydropower Project ha Wah Khri.
Na ka liang ka FKJGP haba ai jingkren paidbah ha Kyrshai lyngba u Bah Serbilin Lyngdoh President FKJGP Ri Muliang, u la ong, “Ngi pyrshah jur ïa ka jingthmu ki bor Sorkar ban ïaid shakhmat ïa ka jingthmu ban shna ïa kane ka project pynmih bording. Namar kane kan ktah ïa ka jingim ba man la ka sngi jong ki nongshong shnong ha ka thaiñ hi baroh kawei”.
“Ngi pynpaw ruh ka jingsngewkmen ba ki khlieh Nongsynshar Hima na ki lai tylli ki Hima, ki la kren shai ba kin ïaid lang bad ki paidbah bad kin nym shah ba kin shna ïa katei ka Project kaba ktah ïa ka it ka Hima jong ki bad ïa ki khun ki hajar ki raiot hapoh kitei ki Hima”.
“Ka FKJGP ka dawa jur ïa ki bor Sorkar ba ki dei ban sangeh noh shisyndon ïa ka jingthmu ban tei ïa kane ka Project ha kane ka jaka, namar kan sa wanrah jingeh ïa ka im ka ïap jong ki nongshong shnong ka thaiñ, la ki long na kano kano ka kynhun jaidbynriew”, u la ong bad bynrap, “Ka Sorkar ka dei jong U Paidbah da U Paidbah na ka bynta U Paidbah, kumta ka dei ban sngap shwa ïa ki paidbah kiba don ïa ka hok ban ym shah ïa katei ka Project”.
“Na ka liang ka Seng ngi pynshlur ïa ki paidbah ka thaiñ ba kin ai ka jingïatreilang ban ym shah da lei lei ïa kane ka Project ba kan urlong hapoh kane ka thaiñ. Ki bor sorkar kim dei ban thom da ka bor ïa ka mon bad ka jingkwah ki paidbah. Lada ka Sorkar kan pyrshang ban shu leh donbor, ngin pynkhihwin ïa ka thaiñ da ki jingïakhih kiba tyngeh”, u la ong.
Ha kane ka jingïalang la wan ïashimbynta ruh da U Syiem Khynnah ka Hima Nongkhlaw Paiem Dr Kiston Manik Syiemlieh, U Syiem ka Hima Rambrai Paiem Order Syiemsad, u Acting Syiem ka Hima Nongmynsaw Paiem Phlowing Syiem Nongbah, u Vice President ka FKJGP West Khasi Hills District Bah Serbilin Lyngdoh ba dei ruh President ka FKJGP Rimuliang Circle, ki nongïalam ka Assam-Meghalaya Protection Committee kiba kynthup ïa U Bah Albert Nonglang President, U Bah Probin Snar Secretary, U Bishwa Rabha bad U Theodas Marak.
Ha kane ka jingïalang, ki paidbah da kajuh ka sur bad kawei ka jingmut ki la pynpaw ïa ka jingpyrshah kaba jur ba kin ym shah lano lano ruh ban tei ïa katei ïa kane ka Project pynmih bording. ‘Ngi la dep ong Em te Em ban den projek bording ïa ka wah Khri’, sawa jam ka sur na ki paidbah.