Shillong, Risaw 09: Da kaba khot ïa ka sorkar kum ka “pyrshah ïa ki trai ri trai muluk” bad kynnoh ba ka kyntiew ïa ka synshar syiem wat ha ka liang ka aiñ, ka VPP ka la dawa ban weng noh mardor ïa u Advocate General Amit Kumar bad pynpaw ïa ka jingïatylli bad ki Bar Association kiba dang kyntait ban leit sha ki iing kashari.
U president ka VPP u Bah Ardent Miller Basaiawmoit u la ong ba ki jingkren jong u AG uba buh jingkylli ïa ka jinglah jong ka Bar ban ïada ïa ki dkhot kynthei jong ka ha ka mukotduma kaba ïadei bad kawei ka kynthei kaba dang pyrshang ïa ka kam ki long “ki bym lah ban pdiang.”
U la kynnoh ba ka sorkar ka la shet kylla ïa ka jingpynthikna jong ka sha ki kynhun ki nongsaid aiñ, da kaba kynnoh ba wat hapdeng ki jingpynthikna na u Myntri Rangbah ka Jylla bad u symbud Myntri Rangbah ka Jylla ba u AG un nym mih shuh na ka bynta ka sorkar, hynrei u dang ïai bteng ban mih ha ïingbishar.
Haba kylli balei ba ka Meghalaya ka dei ban shah mihkhmat da u “nongwei” haba ki nongïasaid aiñ kiba tbit kiba kham rangbah ki don, ka VPP ka la ong ba ka jingpynlut da ki klur tyngka ha ki nongïasaid aiñ kiba nabar ka pyni ba ka sorkar kam sngewthuh ïa ki jingsngew jong ki nongshong shnong.
Ka la kynnoh ruh ïa ka jingthung ïa u AG ka long ba don ka jingïadei kaba jan bad ki bahaïing hasem bad ka jingpynlut kai ïa ka pisa paidbah, da kaba dawa ïa ka jingtohkit kaba laitluid.
Da kaba kynnoh ïa ka sorkar ïa ka “jinglong kaba eh ka bym sngap na ka bynta ka jingpynsangeh ïa ka ïingbishar naduh ka 1 tarik u Risaw, u nongïalam ka VPP u la ong ba ki paidbah ba rit paid kiba wad ïa ka hok ki shah shitom bad u la dawa ban thung ïa u nongïasaid aiñ ba rangbah jong ka thaiñ uba tbit kum u AG u ban wan hadien habud.
