Shillong, Risaw 08: U Symbud Myntri Rangbah ka Jylla ba dei peit ïa ka District Council Affairs, Bah Prestone Tynsong, u la pynskhem ba ka Land Bill kaba la mynjur da ka Khasi Hills Autonomous District Council (KHADC) la pynphai biang sha ka Council.
U la ong ba ka Bill la pynphai da ka Sorkar Jylla bad na ka liang u Lat ka Jylla, ryngkat bad ki jingpynshai ne jingbishar halor ki katto katne ki bynta.
“Ka jinglong mynta ka long ba ngi la pynphai biang, tang katta hi. Na ka liang ka Sorkar bad na ka liang u Lat ngi la pynphai biang ryngkat ki jingpynshai, khamtam ïa ki jingpynshai jong u Lat,” la ong u Bah Prestone haba kren sha ki lad pathai khubor.
U la kyntu ruh ïa ka Council ba kan pynshai halor kine ki jingkylli bad jingpynshai kiba la phah.
