Mar ïadep ka electoral roll bad phiah Konstitwensi thymmai yn sa pynlong noh ïa ka elekshon GHADC

Shillong, Risaw 08 : Ka elekshon sha Garo Hills Autonomous District Council (GHADC) kan sa long hadien ba la pyndep ïa ka jingpynbeit thymmai ïa ki constituency bad ka jingpynkhreh ïa ka electoral roll thymmai, la ong u Symbud Myntri Rangbah ka Jylla uba peit ïa ki kam District Council, Bah Prestone Tynsong.
U Bah Prestone u la ong ba ka jingpynjlan ïa ka samoi treikam jong ka GHADC ka dei namar dang don ar tylli ki kam kiba kongsan kiba dang hap ban pyndep shwa ban pynlong ïa ka elekshon.
“Ka jingpynjlan ïa ka elekshon GHADC ka dei tang namar ar tylli ki mat,” u la ong.
Ka mat kaba nyngkong ka long ka jingpynbeit thymmai ïa ki constituency. U la ong ba ka Delimitation Committee kaba la thaw da ka Sorkar ka la jan dep artad ka kam.
“Ngi la thaw ïa ka Delimitation Committee bad mynta ka kam jong ka ka la jan poi sha kaba kut,” u la ong.
Hadien ba ka Committee ka la pyndep ïa ka report, yn aiti ïa ka sha ka District Council, kaba hap ban wanrah ïa ka report ha ïingdorbar na ka bynta ka jingmynjur. Hadien kata yn phah ïa ka sha u Lat ka Jylla na ka bynta ban ïoh ïa ka jingmynjur.
Kawei pat ka mat kaba hap ban pyndep ka ïadei bad ka Special Intensive Revision (SIR) jong ka electoral roll.
U Bah Prestone u la ong ba ka jingpynmih ïa ka final electoral roll jong ka SIR kan long ha ka 26 tarik mynta u bnai, bad hadien kata ka GHADC kan pdiang ïa ka electoral roll na ka bynta ka elekshon.
U ong ruh ba hadien ba la pynmih ïa ka roll thymmai, ki Returning Officers (RO) ha Garo Hills kin hap ban pynkhreh ïa ka electoral roll kaba kyrpang na ka bynta ka elekshon GHADC.
U la ong ruh ba namar ka jingpynbeit thymmai ïa ka electoral roll, hap ban pdniakhlas ïa ki nongthep vote kiba dei ki riewlum bad bym dei riewlum.
“Kine ki dei ki ar tylli ki kam kiba hap ban pyndep. Ynda kine ki la dep, yn sa buh ïa ka tarik ban pynlong ïa ka elekshon,” ong u Bah Prestone.