Shillong, Lber 24: Ka Shillong Cricket Association (A) kala khur ïa ka nam lahduh ha ka lympung ïalehkai cricket U-23 Boys Inter District Cricket Tournament da kaba pynliem da shi wicket pyrshah ïa ka Tura District Cricket Association ha ka jingïakhun final ha ka sngi Palei ha madan Polo, Shillong. Haba phai sha jingïakhun final, ka Tura ka khlem da lah ban kamai ron ha kaba kala shah pynhap lut baroh ki wicket bad kamai tang 127 ron
Ka Tura kala kam ban tied nyngkong hadien ba kala jop ïa ka jingkynting pisa, bad u Rashid Islam u kamai 25 ron katba u Josiah Cheran Momin u kamai 18 ron. U Jaskirat Singh Sachdeva u la pynkhyllem ïa ki wicket jong kitei ki arngut ki rangtied kiba la kamai bun ron kynthup ïa ar tylli ki wicket ban pyndep da kaba khur 3 wicket ai kamai 33 ron.
Ka Tura kala sdang ban duna kamai ron ha kaba kala shah pynhap noh 6 wicket ha ka jingkamai ba 82 ron shwa ba u Manish Sharma uba kamai 25 ron bad u Aniket Basfor 21 ron kila kyntiew shuh sa 43 ron na bynta ka jingduh noh hynñiew wicket. Ka SCA (A) kala lah ban kawang bol bha ha kaba kala pynkhyllem lut baroh ki wicket bad ai kamai tang 127 ron. U Rabha (Leg-spinner) u khur 2 wicket ai kamai 10 ron, u Santhosh u khur 2 wicket ai kamai 19 bad u Raghav Magotra u kamai 2 wicket ai kamai 28 ron.
Haba beh ïa katei ka thong, ka SCA (A) kaba ïalehkai hala ïing kala lah ban kamai ron bha naduh kaba sdang, bad duh tang tang uwei u wicket na bynta ka jingkamai 50 ron lyngba ka jinglah kamai 37 ron u Mrinal Das. Hynrei ka jingïalehkai kala sdang ban kylla na ka jinglah ban khur da 4 wicket u Sharma uba ai kamai 26 ron ha ki 10 over ba u ïoh ban kawang bol ha kaba ka SCA (A) kala hiar ka jingkami ron da 54 ron bad khyllem noh 4 wicket.
Hynrei ki rangtied kiba shadien ba kynthup ïa u Magotra u kamai 18 ron bad u Zahir Alam 12 ron kala pynlong ïa ka kynhun ba kan kynjoh sha ka 100 ron khlem da hap wicket shuh. Ka SCA (A) kaba donkam satang 28 ron, kala duh noh 4 wicket na bynta 12 ron kiba dang sah, kaba la pynlong ïa ka jingïakhun ba poi sha kaba kut ha kaba ka SCA (A) kala khur syndon ïa ka nam jop.
Ki ar wicket la ïoh da u Brian Lara M Sangma (2/15), katba u Nikrang Sangma, u ïoh shi wicket. U Sharma uba la kamai 25 ron bad shim saw wicket u la khur ruh ïa ka khusnam Man-of-the-match. u Sachdeva, uba khur 12 wicket u la khur ïa ka khusnam Man-of-the-series.
Na ka liang u Honorary Secretary ka MCA u Bah Gideon Kharkongor haba ai jingkren ha ka jingsam khusnam, u la ai ka jingïaroh ïa ki rangïalehkai kiba la lah ban ïalehkai bha bad kyntu ba kin dang pyndonkam hok ïa la ka jong ka sap.
