Shillong, Risaw 04: Ka Seng Samla Malki ka pynpaw ia ka jingsngewkhia kaba jur halor ka jingkiew stet jong ki jingjia ha kaba ki khynnah skul bad ki samla pule kolej ki kyrni ha ka jingdih sikret bad ki pyndonkam ia ki mar dih ha ki uniform skul bad kolej hapoh bad sawdong ka shnong Malki bad ki shnong bad ki jaka kiba marjan.
Katkum ka kyrwoh la ong ba ia kane la ju iohi hajan ki dukan, ki jaka paidbah bad harud ki surok, khamtam ha ki por ba ki skul bad ki kolej ki dang treikam bad hadien ka por wai skul. “Kane ka jingleh ym tang ba ka pynsniew ia ka burom bad ka discipline jong ki skul bad ki kolej, hynrei ka lah ruh ban wanrah ia ka jingktah kaba sniew bha ia ki khynnah kiba dang rit bad ia ka imlang sahlang baroh kawei,” ong ka kyrwoh.
Ha kane ka bynta, ki dkhot ka Seng Samla Malki ki la leit ban iakynduh ia ki Principal bad ki khliehduh jong ki kolej bad skul bapher bapher kiba don hapoh ka thaiñ Malki.
Ha kane ka jingiakynduh, ka Seng Samla ka la dawa bad kyrpad ba ki skul bad ki kolej bapher bapher kin shim ia ki sienjam kiba tyngeh ha ka liang ka discipline bad kin ai jingbthah ia ki khynnah pule halor ka jingdih sikret ne pyndonkam ia kiwei pat ki jingdih katba ki dang phong uniform ha ki jaka paidbah.
La ia kren ruh ban pynkhlaiñ ia ki prokram ai jingtip halor ki jingma bad ki jingktah kiba sniew jong u sikret bad ki drok ia ki khynnah pule.
Nangta ban kyrpad ia ki trai dukan kiba don hajan ki skul bad ki kolej ba kin ym die ia ki mar dih sha ki khynnah pule kiba dang phong uniform.
Shuh shuh ka seng ka pan ia ka jingïatreilang hapdeng ka Seng Samla, ki kmie ki kpa, ki skul bad ki kolej, bad ka Dorbar Shnong bad ban tehlakam ia kane ka jingeh.
“Ka Seng Samla Malki ka pynshai ba kane ka sienjam kam dei ban thmu ban pynrem, ban kynthoh ne ban pynsniew kyrteng ia kano kano ka skul, kolej ne uwei pa uwei u khynnah pule. Hynrei la shim ia kane ka sienjam namar ka jingsngewkhia shisha halor ka lawei jong ki samla jong ngi bad ban pynneh ia ka discipline bad ki jinglong akor kiba bha ha ka imlang sahlang,” ong ka kyrwoh.
Ka Seng ka kyrpad ia baroh ki kmie ki kpa ba kin sngewbha ban peitngor bad buddien ia ki khun jong ki. Ka kyntu ruh ia baroh ki khynnah pule ba kin burom ia ka uniform jong ki bad ia ka burom jong ki skul bad ki kolej jong ki.
“Ngi kyrmen ba ki Principal bad ki bor pyniaid skul kin ai ia ka jingkyrshan bad ka jingïatreilang kaba pura ha kane ka bynta,” ong ka kyrwoh ba la phah da u
Publicity Secretary, Bah Meban Kharmalki.
