Jowai, Risaw 03: Ïa ka Jal Arpan Diwas la rakhe hynnin ka sngi da kaba pynlong ïaka prorkram ha Myntkung Government L.P. School, Mynktung kaba hap hapoh ka Laskeiñ Block, West Jaiñtia Hills District. Kila don haduh phra tylli ki shnong kiba la lah ban pynpoi ïa ka um dih sha ki ïing ki sem lyngba ki Water Supply Schemes kiba treikam hapoh ka thong Har Ghar Jal.
Ha kane ka prokram la wan ïashim bynta da ki Village Water and Sanitation Committees (VWSCs), ki nongïalam shnong, ki paidbah bad ki nongmihkhmat jong ki tnat sorkar bapher bapher na ki phra tylli ki shnong.
U ma M Sutnga uba dei u MDC JHADC ula long kum u kongsan, katba ki SDO na Jowai, Amlarem bad Khliehriat Sub-Divisions kila wan ban donlang.Katba u ma S. Najiar, Executive Engineer (PHE), ula ai ïa ka jingkren ba kongsan halor ka jingdonkam bad ka jingmut jong ka Jal Arpan Diwas.
Ha kane ka sngi la pynlong ruh ka jinghikai halor ka jingdonkam ban don ka jingkitkhlieh kum ki nongshong shnong bad ki VWSCs, la pynshong shit shuh shuh da ki jingshad bad ki jingrwai tynrai da ki khynnah skul, ka jingpyni film, ka jingsam ïa ki certificate bad ka Jal Arpan Pledge.
Ki shnong kiba ïashim bynta ki long Khlookynrin, Khliehrangnah, Pammanik, Mynskiah, Myntkung, Khliehumbuit, Madankynsaw bad Mynkrem. Ha kaba kila don haduh 189 ngut baroh kiba wan sha kane ka prokram jingrakhe.
