Ha Mawlai pynsngewthuh paidbah u Bah Sanbor Shulai, kumno lah ban ïarap u MLA lyngba ka DG

Shillong, Risaw 2: U MLA ka BJP na 19th South Shillong uba dei ruh u Myntri Sorkar mynta ka sngi ka 2 tarik u bnai Risaw u la pynsngewthuh paidbah ïa ka jinglah u MLA ban ïarap ïa ki briew la jong lyngba ka Discretionary Grnad ne kata ka DG kaba ka sorkar ka ju ai T. 20 lak shi snem.
Haba kren ha kawei na ki jingialang kaba la pynlong da ka BJP Mawlai Mandal ha Mawlai Umthlong u Bah Sanbor u la ong ba baroh ki 60 ngut ki MLA ha ka sh snem ki ju ioh mar T.20 ha ka shi snem.
“Ki paidbah kidei ban tip ba baroh 60 ngut ki MLA ki ioh T. 20 lak shi snem bad kane ka grand ka lah don lypa bad ha kano kano ka por lah ban ai jingïarap ïa kino kino ki jingjia ki jia kynsan kynsan” ong u Bah Sanbor.
Haba ai nuksa U Bah Sanbor u la ong, lada jia ki jingjia ba sngewsih lyngba kane ka 20 lak kein u MLA u lah ban ai jingïarap ïa ki briew kiba duk ba rangli da 30 ne 40 hajar tyngka bad kata kadei ka Discretionary Grnad.
“Ka Discretionary Grnad kam shym la ong ne kdew ban long beit thik tang hapoh la ka jong ka Constituency hynrei hap ban kner ïa ki kti ban ai jingiarap khamtam ïa kiba duk basuk” ong u Bah Sanbor.
Shuh shuh u Bah Sanbor u la ong ba hapoh ka constituency jong u ki don haduh 63 na ka 100 kiba dei kiba duk bad na kane ka DG nga ioh ban ai jingiarap sha kito kiba duna bai kot bai skul bai uniform nga ioh ban ai lyngba kane ka grand.
Halor ka jingpynsngew u Bah Lamphrang Mylliem Umlong uba dei u Assistant Rangbah Shnong halor ka jingdonkam ka shnong u Bah Sanbor u la ong, kum ïa ka surok kaba nga la sakhi hi, ka madan Football bad kata ka Community Hall, wanrah da ka application lyngba ki nongkit kam BJP Mawlai bad pynkhreh ïa ki proposal bad sa ïathuh ïa nga bad ngan sa pynkynduh bad ki ophisar ka tnad sorkar.