Jowai, Risaw 02: Ka Loomkyrwiang Dorbar Shnong Jowai mynta ka sngi 2 tarik u Risaw 2026 kala pynlong ïaka ‘Awareness Cum Cleaning Drive Programme’, shi bynta na ka sngi Gandhi Jayanti Day kaba dei ruh ka sngikha jong u Mahatma Gandhi u wei na ki riewkhraw ka Ri India.
Hashwa kane ka don ka jingïalang ba lyngkot ha kaba u ma Lammat-OO Laloo, Waheh Shnong ula long kum shongknor uba la pynsngew ïa ki kam ba bha jong u Mahatma Gandhi bad uba long ruh u nongïaleh laitluid jong ka Ri India.
La ïoh ruh ka jingbatai bniah shaphang ka jingim u Mahatma Gandhi bad ka thong jong ka Swachh Bharat Mission da u ma S.D. Laloo, General Secretary da kaba ïathuh ïa u Mahatma Gandhi la kheiñ burom ym tang hapoh ka Ri India hynrei ha kylleng ka Ri jong ka pyrthei halor ki kam ba khraw jong u bad lyngba ka United Nation General Assembly ha u snem 2007 kala pynbna paidbah ïa kane ka sngi kha u Mahatma Gandhi kaba la tip kum ka International Day of Non-Violence.
Kum ka dak ban ai mynsiem ïa baroh ki khun ka shnong kila shim bynta lang ban pule ïa ka Swachh Bharat Pledge bad la pynkut ïa kane ka prokram da ki kyntien ai khublei da ka Heiyoomitre Pakma, Secretary Social Committee.
Hadien kane ki khun ka shnong kila ïamih lang ban pynkhuid ïa ki kynti ki syngkieñ, ki umbam umdih bad ban pushara shun ïa ki kynroh bad ki rud surok.
