Nongpoh, Nailur 29: Uwei u samla uba la tip kyrteng kum u David Marweiñ, na ka shnong Wahumlalong, Eastern West Khasi Hills, u la shah kem noh ha ki pulit hadien ba la lap na ka met jong u ïa u drok kaba suba ba dei u Heroine, ba don ka jingkhia kumba 9.77 gram.
Katkum ka jingtip ba la ioh lum, kane ka jingjia ka la jia ha ka por kumba 12:50 baje mynsngi, ha ka Toll Gate kaba don haka shnong Pahammawleiñ, 20 Mer. Ki nongtrei ba ap Toll Gate ki la ioh bat ïa utei u samla uba ñiah ïa ka Scooty kaba don ïa u registration number ML 05 AH 7002, hadien ba ki la iohi ba u la mynsaw.
Da ka jingthmu ban ai jingïarap ïa utei u samla, ki nongtrei Toll Gate ki la leit ban ïarap ïa u. Hynrei, ha katei ka por ki la don ruh ki jingsuba ba utei u samla u lah ban dei uba khaii drok. Haba kila kylli, utei u samla, u la phla ba u wan thied drok na ka thaiñ Jorabat.
Hadien kata, la pyntip noh mar mar sha u Superintendent of Police, Ri-Bhoi, bad ki pulit ka Byrnihat Police Station ki la poi sha katei ka jaka ban pynlong ïa ka jingtohkit, ha ka jingdonlang ki nongsakhi.
Hadien ba la ioh ïa ka jingbit bad la pynshai ïa ki nongsakhi, ki pulit ki la pynlong ïa ka jingtalasi katkum ki kyndon jong ka NDPS Act. Ha ka jingtalasi, la lap ïa kawei ka synduk sabon kaba don ïa ki kynja powder kaba la suba ba dei u Heroine.La pynlong ruh ïa ka jingtest ha katei ka jaka ban pynthikna, bad hadien ka jingthew la lap ba ka jingkhia jong ka ka long kumba 9.77 gram.
Naka liang ki pulit, ki dang pynlong ka jingtohkit ban lap ïa kiwei pat ki briew kiba lah ban donkti ha katei ka kam khaii bad pynpoi drok.
