Pynsangeh u MDC Nongstoiñ ïa ka Personal Interview Staff Nurse ha DC Ophis

Nongstoiñ, Nailur 29: Tang shi sngi hadien ba ki dkhot jong ka Voice of the Peoples Party State Youth Wing, ki la ïoh pdiang ïa ka jingujor halor ka rukom thungkam ka bym khuid ha ka tnad Maternal Child Health Hospital Nongstoiñ, na ka liang ki nongïalam ka State Youth Wing ha ryngkat ka jingdonlang u Dr Juristman Ïawphniaw MDC Nongstoiñ, ha ka sngi hat majai jong ka taiew ki la leit ban ïakynduh ïa ka Deputy Commissioner ryngkat ka jingthoh ban dawa ba dei ban pynbeit ïa kane ka kam.
Hynrei, katba ki dang don ha DC ophis ban ïakynduh ïa ka Deputy Commissioner ban dawa ban pynsangeh shwa ïa personal interview.Pynban, ki la lap ba ki bor pynïaid ki dang ïaid shakhmat ban shim interview ïa ki samla.
Halor kane, na ka liang u MDC u la rung beit beit sha kamra interview ha ryngkat ka jingbthah ba dei ban pynsangeh shwa ïa ka personal interview. Hadien kane la pynsangeh noh shwa ïa ka personal interview.
Na ka liang u MDC u la ong ba baroh ki la ïohi bad ïoh sngew lut na ki dur khih ba kam shym don satia ka rukom pynïaid kaba beit ha kane ka jingthung kam ba mynta. U da ong ruh ba ka seng hi ka don ruh ïa ki sakhi satar. U la ong ba ka kam mynta ka dei ban don ha ka jingtohkit bad katba ym pat lah ban pynbeit ym lah satia ban pynïaid shakhmat ïa kane ka kam.
Haba kren sha ki lad pathai khubor hadien ka jingmih na DC ophis, u Bah Robert Wahlang nongïalam ka VPP State Yough Wing, u la ong ba na ka liang ka DC hi kam shym la ai ka jubab kaba shai halor kane. Ym tang katta ka interview ruh ka ïaid beit shakhmat, ha kaba u la ong ba kane ka dei ka bym lah satia ban pdiang, namar ym pat la satia ban pynbeit.
Katba katkum ka jingkam jong ki katto katne ki kyrtong kiba ap shabar jong ka jaka pynlong interview, la ong ba ka jingshim interview ka la ïaid ha ka por ba ki wan ban pynsangeh, ha kaba ki la pynpaw ruh ïa ka jingsngew lyngngoh ïa katei ka jingjia. Ki la ong ba ki la ap beit thik ha katei ka jaka tad haduh ban da ïoh ïa ka jingpynshai na ki bor pynïaid District.
Ki heh jong ka bor synshar District ki la ïathuh ba ki la don kumba 60 ngut ki wan interview ha katei ka kam Staff Nurse, kaba dei ruh tang ka contractual basis na ka bynta hynriew bnai bad la ong ruh ba baroh kiba la pass ïa ka eksamin ki la long kiba bit ba biang ban wan sha ka interview.
Katkum ka jingïathuh jong ki heh sorkar, katba ka interview ka dang ïaid, u MDC ka Nongstoiñ bad uwei pat uba synran ïa u ki la rung shapoh kamra interview hynrei na ka liang jong ka Deputy Commissioner kaba don hapoh ka la ong ïa ki ban mih noh shabar bad kham hadien bai oh ban ïakren hapoh ka kamra treikam jong ka DC.
Ki heh jong ka bor synshar District ki la pynpaw shuh shuh ba kam shym la don kano kano ka jingbym ryntih ha ka rukom interview. Ym shym la ïoh kano kano ka jingujor na ki kyrtong ha kaba ïadei bad ka tnad ba dei peit ne ka bor synshar District.
Hynrei, halor knae ka jingpynthut, ki la hap pynsangeh noh shipor ïa ka jingpynlong interview, tad ynda ki la pyntikna pat ba ka interview kan ïaid beit bad ïa ka tarik yn sa pynbna hadien.