Ïoh ka Shillong ban pynlong lang ïa ka Indian Women’s League, yn mih aireng lang ka Jakrem ha ka sien kaba nyngkong
Ki jingïalehkai jong Group C
25 Risaw, 2026 :
Mumbai Knights vs Kemp, 9:00 baje mynstep
Jakrem vs AIFF TDS, 4:00 baje janmiet
27 Risaw, 2026
AIFF TDS vs Mumbai Knights, 9:00 baje mynstep
Kemp vs Jakrem, 4:00 baje janmiet
29 Risaw, 2026:
Kemp vs AIFF TDS, 9:00 baje mynstep
Mumbai Knights vs Jakrem, 4:00 baje janmiet.
Shillong, Nailar 29: Ka Meghalaya Football Association (MFA) ka pynpaw ka jingsngewkmen ban pyntip ba la jied ïa ka Shillong kum kawei na ki jaka pynlong ïa ka round kaba nyngkong jong ka Second Division jong ka Indian Women’s League 2026-27 (IWL 2).
Ïa ki jingïakhun jong Group C yn pynlong ha SSA Stadium, Polo ha u bnai ban wan, ha kaba ka Jakrem FC, kaba la long ka lahduh jong ka Meghalaya Women’s State League 2025 kan ïashim bynta ha kane ka lympung ha ka sien kaba nyngkong eh.
Ym ju don satia kano kano ka club na Meghalaya kaba la ïashim bynta ha ka IWL ne IWL 2, watla ka la don mynshwa ka jingkhot ïa ka Royal Wahingdoh ban ïashim bynta ha ki jingïalehkai knieh rung jong ka IWL kaba nyngkong ha ka snem 2026-17.
Hynrei, kim shym la lah ban rung sha ka kylla kaba bud hadien ba ki la rem ha baroh saw tylli ki jingïalehkai jong ki.
Da ka jingpynlong ïa ka women’s league kaba kyrpang ha kylleng ka jylla da ka MFA ha u snem ba la dep, ka Jakrem ka la ïoh ïa ka kabu ksiar bynta ban ïashim bynta ha ka IWL 2 jong kane ka samoi.
Ka Jakrem kan ïasoh bad ka TDS Academy jong ka All India Football Federation, Kemp FC bad Mumbai Knights FC ha Group C.
Ki saw tylli ki klob kiba long ki lahduh ha ki group bad ki ar tylli ki kynhun kiba wan ha ka kyrdan kaba ar kiba don ïa ka rekod kaba bha tam kin ïoh rung sha ka final round, kaban sdang ha u Naiwieng.
Watla kane ka dei ka league kaba pynïaid na bynta ki club, hynrei ka MFA kan pyndonkam ïa ka IWL 2 kum ka jaka pynkhreh ïa ka jingïashim bynta jong ka jylla ha ka 39th National Games jong ka snem ban wan kaban long ha kane hi ka jylla.