Shillong, Nailur 28: Ka Nongkseh ka la pynliem da kaba suk ïa ka Sawmer da 3-0 ha ka jingïakhun jong ka Shillong Premier League 2026 ba la long hynne ka sngi Nyngkong ha SSA Stadium.
U Kitboklang Pale (30’), u Mebankhraw Wahlang (37’) bad u Hardy Cliff Nongbri (88’) ki la pynkhihjar mar kawei na ka bynta ka Nongkseh, kaba la pynlong ïa ka kynhun ban kiew sha ka kyrdan ba lai hadien lai sien lynter ki namjop.
Mynta ka Nongkseh ka la kamai 13 point naki hynñiew tylli ki jingïalehkai bad ban tam ïa ka Mawlai (kaba kamai 12 poiñ naki 6 sien ïakhun). Ha kawei pat ka liang, ka Sawmer ka dang ïaineh ha ka kyrdan ba hynriew da 9 point.
Haba phai sha ka jingïakhun, ka Sawmer ka la ïalehkai kham husiar ban pynduna ïa ka jingjulor bad kam shym la ailad satia ïa ka Nongkseh ban ïaid lyngba ha ka shiteng kynta ba nyngkong jong ka jingïalehkai. Hynrei kim shym la lah ban leh eiei ban khanglad ïa u Kitboklang, uba la tehlakam ïa ka bol pashat da ka shadem bad nangta u la pyllait lyngba u Khrawkupar Tamu shuwa ba un thep pat ïa ka bol sha kol.
Tang hadien katto katne minit ka Nongkseh ka la pynjlan ïa ka kol lamkhmat. Kane ka kol ka la urlong hadien ba u Mebankhraw u la pynïakynduh tiak da ka khlieh ïa ka bol pashat corner kick jong u Hardy.
Ha ki minit ba dang sah shuwa ba ka jingïakhun kan jam sha ka por shongthait, u Pyrshangbanbha Dkhar rangap kol ka Sawmer, u la lah ban khanglad ar tylli ki kabu thep kol ba thikna, kaba la khanglad ïa ka Nongkseh ban nang pynjlan ïa ka kol lamkhmat.
Haba wanphai sha ka kylla miet, ka Nongkseh ka la pynthikna ïa ka jingjop da kaba thep ïa ka kol kaba lai lyngba u kapten jong ka, u Hardy, uba la pynkhihjar na ka bol pashat jong u Kitboklang.
Ka jingpyrshang kaba bha tam jong ka Summer ka la wan ha ka minit kaba 70 ha ka por ba ka freekick jong u Banshanlang Dkhar ka la sangah ïa u dieng kol.
Ha kane ka sngi Ba-ar ka jingïakhun kan long hapdeng ka kynhun ba wan kyrdan ba saw bad ba san, ha kaba ka Mawlai kan aireng pyrshah ïa ka Meghalaya Police. Kane ka jingïalehkai kan long ha ka por 3 baje nohphaisngi.
