Shillong, Nailur 27: Ka Langsning, kaba ïada ïa ka burom lahduh, ka la pynliem noh da 2-0 ïa ka Mylliem, kaba don sha trai duh jong ka miej, ha ka jingïakhun jong ka Shillong Premier League 2026 ha SSA Stadium, kaba la long ha ka sngi Saitjaiñ.
U Wallambok Dkhar (77’) u la thep ïa ka kol ba nyngkong katba u Samuel L Kynshi (90’+2) u la bynrap ïa kaba ar ha ki minit pynjlan ba khatduh ban rah biang ïa ka Langsning sha khlieh duh jong ka miej, da kaba kamai 16 poiñ.
Ka jingjop jong ka Langsning ka la pynlong ïa ka Shillong Lajong (14 poiñ) ban hiar sha ka kyrdan ba ar, bad baroh ar tylli ki kynhun ki la ïalehkai mar hynñiew sien. Ka Mylliem ka dang bteng ban bat ïa ka kyrdan ba khatduh da tang 1 poiñ (kumjuh hadien 7 tylli ki jingïalehkai), kaba buh ïa ka kynhun ha ka jingma kaba khraw, namar kumba ka long mynta, ka long kaba eh ïa kane ka kynhun ban lait na ka jingshah pynhiar kyrdan.
Haba phai sha ka jingïakhun, ka kol ba nyngkong la thep lyngba ka korner kick ba la pashat da u Samuel, ha kaba u Wallambok u la kynthih ban pynïakynduh tiak da ka khlieh bad pynrung jlang ïa ka bol shapoh kol.
Katba kaba ar ka la urlong na ka jingpyrshang jong u Samuel, kaba la paw kumba kan shah bat da kaba suk ha u nongapkol u Rihoklang Khongjoh, pynban ka bol ka la ïaid beit beit lyngba ki kti jong u.
Mynta ka Langsning ka la jop saw sien na ki san tylli ki jingïalehkai ba la dep bad kane ka dei ka jingïalehkai kaba lai sien lynter ba ka kynhun kam shym la shah thep ha ka liang pyrshah. Kane ka jingjop ka la long ruh kaba kongsan namar ki ar tylli ki jingïalehkai kiba dang sah kin long pyrshah ïa ki kynhun ba kham khlaiñbor – ka Lajong ha ka 01 tarik Risaw bad ka Nongkseh ha ka 10 tarik Risaw.
Ha kane ka sngi Nyngkong, ka Sawmer kaba wan ha ka kyrdan kaba hynriew kan ïakhun pyrshah ïa ka Nongkseh kaba wan ha ka kyrdan kaba saw, ha ka por 3 baje nohphai sngi. Lah ban kdew ba tang kawei ka poiñ kaba pynïapher ïa kine ki ar liang mamla hynrei ka Nongkseh kan sdang kum ka kynhun ba don jingkyrmen ban khur ïa ka jingjop.
