Shillong, Nailur 26: Ka Mawkhar SC bad ka Pohkseh SC ki la ïasam mar shi point naba ïakhaid mar 1-1 kol ha kawei na ki jingïakhun jong ka Group B ha ka lympung First Division 2026 ba la pynïai da ka Shillong Sports Association, ba la long ha ka sngi Saitjaiñ, ha SSA Ground.
Haba phai sha ka jingïalehkai, ka Pohkseh ka la ïoh pynkhihjar nyngkong lyngba u Welborn Pyngrope (20’) hynrei ka Mawkhar ka la lah ba kan jubab da kaba pynïakhaid lyngba u Mackiven Shyrkon (54’) ha ka kylla miet.
Ka jingïakhaid ka la kyntiew ïa ka Mawkhar sha ka kyrdan ba ar ha ka Group, da kaba kamai 4 point, katba ka Pohkseh ka la khur ïa ka point ba nyngkong hadien ba ka la sdang ïa ka aïom da ka nam rem ha ka Mylliem Lum.
Ka jingïalehkai SSA 1st Division 2026 ha kane ka sngi Nyngkong (28 tarik Nailur, 2026) kan long jong ka Group A, kata hapdeng ka Laitkyrhong SC pyrshah ïa ka Malki SC, ha ka por 12:15 baje mynsngi.
