Shillong, Nailur 27: Ki nongïalehkai Karate jong ka Shillong College ki la jop san tylli na ki hynriew tylli ki nam lahduh ha ka sienjam kaba 13 jong ka lympung Inter-School Karate Tournament 2025, kaba la pynlong da ka All Meghalaya Karate-Do Association (AMKA), ha ka jingïakob kaba shisngi ha ka sngi Saitjaiñ.
Barih ki don 30 ngut ki nongïalehkai kiba la ïashim bynta na ki 11 tylli ki jaka pule bapher bapher.
ïa kane ka lympung la pynlong ryngkat ka jingïatreilang bad ka Sports Development Cell jong ka Shillong College, ka jaka ba la pynlong ïa ki jingïakop, bad la kyrshan ruh da ka tnad Directorate of Sports and Youth Affairs jong ka sorkar Meghalaya.
ïa kane ka lympung la pyndonkam ruh kum shi bynta jong ka prokram wad sap jong ka AMKA na ka bynta ka 39th National Games 2027, ïa kaba ka jylla Meghalaya kan sa pynlong ha u snem ban wan.
U Gideon Tympuin jong ka Shillong College, u la jop ïa baroh ar ki nam lahduh ha ka Men’s Individual Kata bad Men’s Individual Kumite. Katba ïa ka kyrdan ba nyngkong ha ka Men’s Team Kumite la jop da ka kynhun ki nongïalehkai jong ka St Anthony’s College, ba kynthup ïa u Aventinus George Mylliem, Damebanmerbha S Blah, Samebanmerbha S Blah, Ferdinand Samkupar Rani bad u Jasper D Pdang.
Ha ka jingïakop jong ki kynthei, ka Rebeka Nongspung jong ka Shillong College ka la ïoh ban khur ïa ka takma ksiar ha ka Women’s Individual Kata, Women’s Individual Kumite bad ruh ha ka Women’s Team Kumite ryngkat ki paralok jong ka, ba kynthup ïa ka Larisha Kurbah, Kynjailin L Mawnai, Daphilahun Meri Wahlang bad ka Ibadaplin Mukhim.
Ka Shillong College ka la pynkut kum ka kynhun lahduh lane ka Team Champion ha ka jingïalehkai jong ki shynrang bad kynthei, katba ka St Anthony’s (shynrang) bad ka Lady Keane College (kynthei) ki la pyndep ha ka kyrdan ba ar.
La wan kongsan ha ka jingïalang plie pyrda da u District Sports Officer jong ka East Khasi Hills District, bah Damang Syngkon, uba dei ruh u nongïalehkai karate uba la jop takma ha ka kyrdan National bad International level bad kumjuh ruh u Vice-President jong ka AMKA. Ha ka jingïalang pynhap pyrda la wan kongsan da ka Dr H Diengdoh, kaba dei ka Vice-Principal, Academy bad Student Welfare jong ka Shillong College.
Haba ai jingkren, u bah Damang Syngkon u la kdew ba ka don ka jinghiar ha ka liang ka jingkheiñ naduh ki lympung ïalehkai hapdeng ki skul haduh ki kolej jong ka AMKA, ha kaba kaba mynshuwa ka ju lum lang da ki spah ngut ki nongïalehkai karate man la u snem. “Ngi dang pyrshang ban weng ïa kane bad ki lympung ïalehkai hapdeng ki kolej bad ka kynhun jong ka jylla ka la nang khlain. Kane ka dei namar ka jingtrei shitom jong ka AMKA bad ka sorkar jylla,” la ong u bah Damang Syngkon.
U la ai ruh ka jingithuh ïa ki nongjop ba thymmai jong ka ri kiba dang wan, kum u Gideon Tympuin, uba la khur ïa ka takma ksiar ha ka lympung ïalehkai jong ka ri ha New Delhi ha u bnai Rymphang-Lber bad ïa ka takma rnong ha ka South Asian Championship ha u bnai Naitung.
U DSO u la ithuh ruh ïa u bah Donboklang Lyngdoh uba dei u Technical Director ka AMKA, uba la long mynta u 6th Dan black belt.
Ki kyrteng jong ki nongjop haduh kiba wan kyrdan ba lai ha ki jingïakop ba shimet bad kynhun ha kane ka Inter-School Karate Tournament 2025.
Men Open Kata
1st – Gideon Tympuin – Shillong College
2nd – Ferdinand Samkupar Rani – St Anthony’s College
3rd – Aventinus George Mylliem – St Anthony’s College
3rd – Gregorwilson Makdoh – Shillong College
Men Open Kumite
1st – Gideon Tympuin – Shillong College
2nd – Aventinus George Mylliem – St Anthony’s College
3rd – Kynpham Kharkongor-Institute of Hotel Management
3rd – Ferdinand Samkupar Rani – St Anthony’s College
Men Team Kumite
1st – St Anthony’s College (Aventinus George Mylliem, Damebanmerbha S Blah, Samebanmerbha S Blah, Ferdinand Samkupar Rani and Jasper D Pdang)
2nd – Shillong College (Gideon Tympuin, Cheltis Shylla, Gregorwilson Makdoh, Nangkitbok Phira, Jake Damian Syiemiong)
Women Open Kata
1st – Rebeka Nongspung – Shillong College
2nd – Sweety Ranee – Lady Keane College
3rd – Melvarica Kharbani – St Mary’s College
3rd – Daphilahun Meri Wahlang – Shillong College
Women Open Kumite
1st – Rebeka Nongspung – Shillong College
2nd – Larisha Kurbah – Shillong College
3rd – Kynjailin L Mawnai – Shillong College
3rd – Daphilahun Meri Wahlang – Shillong College
Women Team Kumite
1st – Shillong College (Rebeka Nongspun, Larisha Kurbah, Kynjailin L Mawnai, Daphilahun Meri Wahlang and Ibadaplin Mukhim)
2nd – St Anthony’s College (Daiarisa Nongrum, Delightful Marngar, Habisha Mary Thongni)