Guwahati, Nailur 26: Hadien 131 sngi ba la pynthut ka leit ka wan ha ki surok bah, ka United Naga Council (UNC) ka la rai ban weng noh shipor ïa ka jingkhang ïa ka economic blockade jong ka ha ki surok bah ba kongsan ha Manipur hadien ka jingïalang ba lai kynta jong ka sorkar kmie bad ka sorkar Manipur ha Guwahati ha ka sngi Saitjaiñ.
Kane ka rai ka la wan hadien ka jingpynthikna na ka tnad kam pohïing bad ka sorkar Manipur ba ïa ki jingdawa ba kongsan jong ka UNC yn sa shim lyngba ki jingïakren ba bud ryntih.
Ïa kane ka jingïalang la pynlong ha BSF Frontier Headquarters Officers’ Mess ha Garbhanga bad la ïalum lang ïa ki heh ophisar na ka MHA, ka tnad kam pohïing ka jylla Manipur bad ka kynhun Naga kaba don 10 ngut tam ba la ïalam da ka UNC.
Ka UNC ka la pynbor ban leh ei ei halor ki katto katne ki mat kiba ktah ïa ki jaka ba shong ba sah ki Naga ha Manipur.
Ki jingdawa jong ka ki kynthup ïa ka jingpyndam noh ïa ka jingiateh Suspension of Operations (SoO) bad ki kynhun lehnoh Kuki, ban leh pyrshah ïa kiba donkti ban rahbor bad pyniap ïa ki riew paidbah ka Liangmai Naga, bad ban khang ïa ki kynhun kai khlaw ba la kynnoh ba ki thombor ïa ki riew paidbah ha ki thain ba shong ki Naga.
Ka kynhun ka la pan ruh ban weng noh ïa ki heh ophisar kiba ka la kynnoh ba kim shym la lah ban pynthikna ïa ka jingshngaiñ bad ka jinglong pdeng ha ki district kiba don ka jingsngewkhia.
Ka UNC ka la rai ban pynsangeh shwa shipor ïa ka jingkhang dam ïa ki surok bah hadien ki jingkular ba la ai ha ka jingïakren kaba la long ha ka sngi Saitjaiñ.
Ka jingweng noh ïa ka jingkhang dam la khmih lynti ba kan pynsuk ïa ka leit ka wan jong ki mar ki mata bad ki jingdonkam ha ki surok bah jong ka Manipur.Ki surok ba shah ktah ki kynthup ïa ka National Highway-2, kaba pynïasoh ïa ka Imphal bad ka Dimapur, bad ka National Highway-37, kaba pynïasoh ïa ka Imphal bad ka Jiribam.Kane ka jingkhang dam ba la slem kala wanrah ka jingthut ba khraw namar ba ki trok ki sah kut beit ha surok.
Ha kane ka kynhun ki Naga ki kynthup ïa ki nongmihkhmat jong ka All Naga Students’ Association Manipur (ANSAM), Naga Women’s Union (NWU), ka Liangmai Naga Council (LNC), ka Rongmei Naga Council (RNC), ka Joint Tribe Council-Manipur (JTC-M) bad ka Naga Peoples’ Organisation (NPO).
