Nongstoiñ, Nailur 25: Ha ka sngi palei mynta ka taïew, u Syiem ka Hima Nongstoiñ u Pa’iem Phylla Singh Syiem, Syiem ka Hima Nongstoiñ kum u kongsan, u la plie paidbah ïa ka ïew thymmai kaba don ha ka shnong Nonglwai II, kawei na ki shnong ka Nongstoiñ C&RD Block West Khasi Hills District.
Katei ka ïew thymmai kaba la tip ruh kum ka Lai Lyngdoh Farmer’s Markets, ka dei kaba la bei tyngka da ka IFAD kaba la kot sha ka 50 lak tyngka da ka NEC bad 65 lak tyngka lyngba ka Meghalaya Livelihoods and Access to Market (MLAMP), kaba la pyntreikam pat da ka Meghalaya Basin Management Agency (MBMA).
La ong ba ka ïa katei ka jaka ïew la ai da ka kong T.Jyndiang bad na ka liang ka A.T. Shipara Self Help Group, ka dei kawei na ki radbah kaba la donkti ban wanrah ïa katei ka ïew thymmai.
Ka jingthmu ka long ruh ban pynsting pynsuk ïa ki paidbah ba kin lait na ka ban leit pynlut por pynlut pisa, da kaba leit ïew sha kiwei pat ki ïew kiba kham pajih, namar katei ka shnong ka dei kawei na ki shnong kaba khlaiñ bha ban pynmih jhur ha ka thaiñ Nongstoiñ.
Ha kane ka jingplie ïa kane ka ïew la don ryngkat ruh da kiwei pat ki kynrem ki lyndan, ba kynthup ïa u bah A.S.Suting Deputy Project Director, MBMA, bah A.R.Nongkhlaw District Project Manager West Khasi Hills District, bah Rodonald Majaw, RPM, MBMA, bah George Kharbani sordar ka shnong Nonglwai II bad kiwei kiwei ki ophisar sorkar.
Na ka liang u kongsan u la ai khublei kitbok kitrwiang ïa ka shnong Nonglwai II, ha ryngkat ki jingkyntu kynpham kumno ban ri ban sumar khamtam ban pynneh pynsah ïa ka jinghuid jingsuba.
U la ong ba ka shnong Nonglwai lei lei ka dei kawei na ki jaka ba khuid tam wat hapoh ka Hima lane wat ha West Khasi Hills District, kumta dei ban pynneh ban sumar khnang ba kan long ka jingmyntoi bad jingkyrkhu na ka bynta jong baroh.
