Shillong, Nailur 22 : Ka Meghalaya Jeet Kune Do Association ka pynpaw ïa ka jingsngewkmen bad ka jingïaroh ïa ki nongïalehkai Jeet Kune Do na Meghalaya kiba mihkhmat ïa ka Team India ha ka South Asian Jeet Kune Do Championship 2026, kaba la long ha Cotton University, Guwahati, Assam, naduh ka 18 haduh ka 20 tarik Nailur, 2026.
Ki 30 ngut ki nongïalehkai na Meghalaya kiba la ïashim bynta kum ka kynhun India ki la ïoh khur haduh 26 tylli ki takma ksiar, 6 tylli ki takma rupa bad kawei ka takma rnong. Ka jingjop jong ki ka la noh synñiang ruh ban pynlong ïa Team India kum ka Overall Team Champion jong ka lympung, ong ka kyrwoh.
Ka Association ka ai ka jingïaroh ïa baroh ki nongïalehkai, ki coach, ki ophisar bad ki nongkyrshan kiba la don bynta ha kane ka jingjop.
Ka jingaiti lut, ka jingdon ka disiplin bad ka jingtrei shitom jong ki ka la wanrah burom ïa ka Meghalaya bad ka ri India.
Ka Association ka kyrmen ruh ba kane ka jingjop kan long ka jingpynshlur ïa kiba bun ki samla nongïalehkai na Meghalaya ban bud ïa ka lynti jong ka jingjop ha ki jingïalehkai martial arts, bad ban wanrah burom ïa ka jylla bad ka ri.
Ka Meghalaya Jeet Kune Do Association ka ai ruh ka jingkitbok ïa baroh kiba khur takma bad ïa ka Team India halor kane ka jingjop, ong ka kyrwoh ba la phah da ka Meghalaya Jeet Kune Do Association, Shillong.
