Buhthong ka Jylla ban ym don shuh ki kmie ba khlad por ba kha khunlung

Shillong, Nailur 21 : U Myntri Rangbah ka Jylla, Conrad K Sangma ha ka sngi Nyngkong, u la plie paidbah ïa ka jingtei thymmai ba 50 jingthiah jong ka District Maternity & Child Hospital (DMCH), Tura ha ryngkat ka jingdonlang u Sampath Kumar, IAS, Additional Chief Secretary ka Sorkar Jylla, u Vibhor Aggarwal, IAS, Deputy Commissioner ka West Garo Hills, ki Ophisar ka Tnad ka Koit ka Khiah, ki Doktor bad kiwei kiwei
Ha kane ka jingïalang, u Myntri Rangbah ula pyllait bad sam paidbah ruh ïa ki tiar ba kyrpang na ka bynta ki longkmie bad khunlung ba tip kum ki Mother & Child Care Kits sha ki nongïoh bynta kiba shah sumar hapoh ka hospital.
Haba kren ha kane ka sngi, u Myntri Rangbah u la ai ka jingïaroh ïa ka Tnad ka Koit ka Khiah bad ban jur ba ka jingïada ïa ka jingim ka dei ka jingkitkhlieh lang jong baroh. U la ïathuh ba naduh u 2018, ka Sorkar ka la buh hakhmat eh sha ka kam shakri ïa ka imlang sahlang, naduh ka koit ka khiah, ka pule dangle bad ka bha ka miat ka imlang sahlang kaba kot ïa shibynta na ka saw bynta jong ka mangtyngka ka Jylla.
Shuh shuh u la ong ba ka Meghalaya ka la ïohi ïa ka jinghiar kaba bun eh ha ka jingïap ki Kmie ba kha khun hapoh ka Ri, kaba kot haduh 55 persen ka jinghiar. Hynrei, u la ban jur ba ka thong kaba khatduh hi ka dei ban ym don shuh ka jingïap ki Kmie bad ki Khunlung.
U Myntri Rangbah u la pynpaw ruh ba ka Mother & Child Health Model ka Jylla k ala ïoh ïa ka jingithuh hapoh ka ri bad pyntip ba u la shah khot ban ai ka jingbatai ïa kane ka rukom treikam hakhmat u Myntri Rangbah Duh ka ri, kaba long ka khyllipmat kaba sngew sarong ïa ka Jylla.
U la bynrap ba ki dang don bun ki projek jong ka koit ka khiah kiba dang pynkhreh mynta hapoh ka PM-DevINE scheme nalor ka jingthmu ban nang pynheh ïa ka Mother & Child Hospital.
Kiwei pat kiba la ai jingkren ki kynthup ïa u Sampath Kumar, Dr. P. Chyne, Director of Health Services (MCH & FW), kiba la pynpaw ïa ka jingsngewnguh ïa u Myntri Rangbah namar ka jingkyrshan ba khlem sangeh bad ka jingkut jingmut ban nang pynkhlain ïa ka jingshakri ha ka koit ka khiah ha ka jylla.