Yn ngat ki kontraktor lada ym leit kyntiew kyrteng ïa ki bar jylla ba ki aikam: Myntri

Shillong, Nailur 21 : U Myntri ka tnat Labour ka Sorkar Jylla, Bah Methodius Dkhar ha ka sngi Nyngkong u la pyntip ba ki kyndon kiba thymmai kiba ïadei bad ki nongbylla bar jylla ki la treikam mynta bad ka don ruh ka kyndon ïa ki kontraktor ba kin shah daiñ kuna bad shah set along lada ki pynkheiñ ïa ka.
Ha kajuh ka por u la pynkynmaw ruh ba ka tnad dang shen ka la plie paidbah ïa ka website bad ka MIRSS portal na bynta ban pynsuk ïa ka jingrejistar ïa ki nongbylla bar jylla kiba wan tei sha kane ka jylla.
“Ka portal ka la treikam mynta bad ki kyndon kiba la pynkylla ki la treikam lang. Lyngba kane ka sienjam kan pynsuk ban rejistar ïa ki nongbylla bar jylla, hynrei ki kyndon kin kham tyngeh ban pyntikna ba ki kontraktor kin bud ïa ki kyndon kiba ïadei bad ki nongbylla ba wan ïalam na shabar jylla,” bynrap shuh shuh u Bah Methodius.
Katkum ka jingong jong u, kito kiba pynkheiñ ïa ki kyndon kin shah pynshitom katkum ki kyrdan ba la buh.
“Ha ka sien banyngkong, ka kuna kan long 10,000 tyngka, ha ka sien kaba ar kan long 25,000 tyngka, bad ha ka sien kaba lai kan long 1 lak tyngka ryngkat bad ka jingshah set along kaba lai bnai,” u la ong.
U Myntri u la pynshai ba ka jingkitkhlieh kaba kham khia ka long ha u kontraktor uba dei u nongai bylla.
“Ka kuna kan dei ïa u kontraktor, ym ïa u nongbylla, namar lada u nongbylla u wan hi marwei, dang donkam ban don u briew uba thungkam ïa u. Lada ym don mano-mano ban thungkam ïa u, ngim lah ban khot ïa u kum u nongbylla,” la bynrap biang u Myntri.
Shuh shuh u ong ba ka kamram jong ka tnad kam dei satia ban leit buddien ïa ki briew ha ki surok hynrei kan dei beit ha ki jaka trei bad lada lap ba nongbylla bar jylla kiba trei ha kato ka jaka ki khlem pat rejistar, u kontraktor un ngat ha ka jingshah pynshitom.