Nongstoiñ, Nailur 21: Haba ai jingkren ha ka jingïalang rakhe dap san snem jong ka All Furniture Association West Khasi Hills District, u MLA jong ka Nongstoiñ Bah Gabriel Wahlang kum u Kongsan u la ong ba ka por ka la dei ba ki nongseng kam kin ïaleh katba lah ban nang pynbun shuh shuh ki lad ai kam ai jam na ka bynta kiwei pat.
U la ong ruh ba ka la donkam ïa ki nongtrei furniture ba kin pyrkhat thymmai bad pynwandur ïa ki design lajong, namar kumba ka long mynta ki briew ki ïabeh ban thied furniture na kiba nabar. Hynrei, ki dieng ki dei kiba mih na ka jaka la jong bad hadien ba la dep shna design kiba nabar ki wan die kylla sha ki jaka jong ngi hi
Shuh shuh u Kongsan u la kyntu ruh ïa ki nongtrei furniture, ba kin aplai ïa ka laisen lyngba ki saw mill kaba hap ban aplai shwa na District Council nangta sa na ka sorkar, khnang ba kan pynsuk ïa ki haba ki kwah ban shalan ïa ki mar jong ki shabar ka Jylla bad ban register ruh ïalade sha ka tnad labour, namar ki don shibun ki jingmyntoi ban ïoh na ka sorkar lyngba ki tnad treikam bapher bapher.
Ha katei ka jingrakhe dap 5 snem ka Association kaba la long ha Mecofed Hall New Nongstoiñ ha ka sngi nyngkong, la ïadonlang ruh u bah ophisar ka tnad Labour u bah M.J Kharbudon, u ophisar ka tnad Industry u bah E.K Mawsor, u Fr. John napoh ka Don Bosco Tech Nongstoiñ, ki nongïalam ka Association bad baroh ki shnat treikam hapoh jong ka Association.
Kum ka dak jong ka jingplie ïa katei ka jingrakhe, na ka lïang jong u President jong ka Association u bah Synsharbor K.Jahrin ha ryngkat u MLA ka Nongstoiñ u bah Gabriel Wahlang, ki la ot ïa u cake bad na ka liang jong u Secretary ka Association u bah K.L Langrin u la ïoh ban pynsngew ïa ka khana lyngkot jong ka jingïaid lynti ka Association.
