Da ki marbam bad song pisa leit ban noh synñiang ka MSE&PDF ha shnong Rangblang

Mawkyrwat, ‘Nailur 20: Kum shi bynta ban ai jingkyrshan bad ai mynsiem ïa ki longïing kiba donkam jingïarap, ka Mawkyrwat Socio Economic & People Development Forum (MSE&PDF) mynta ka sngi ka la leit ban noh synñiang da ki marbam ryngkat ka song pisa sha ki ar tylli ki longïing ha shnong Rangblang, South West Khasi Hills District, kiba dang mad ïa ki jingeh kiba bun, khamtam na ka daw jong ka jingduk jingkyrduh.
Kine ki ar tylli ki longïing ki kynthup ïa ka longïing jong ka Kong Balarisha Syiemiong, kaba don san ngut ki khun, ha kaba uwei na ki khun jong ka u don hapdeng ka jingduna ha ki dkhot met. Kawei pat ka longïing ka dei jong ka Kong Ranisha Khardewsaw, kaba don lai ngut ki khun.
Ka jingleit ban noh synñiang jong ka MSE&PDF, ka long shibynta na ka bynta ban ai mynsiem, ai jingkyrshan lem bad ban pyni ïa ka jingkitkhlieh, ka jingïatreilang bad ki longïing kiba donkam ka jingïarap ha ka imlang sahlang.
Ha kane ka sngi la ïa donlang u Bah Daros Ramsiej, President, u Bah Philip Marweiñ, General Secretary, u Bah Skanding Ramsiej, Adviser, jong ka ka Mawkyrwat Socio Economic & People Development Forum (MSE&PDF) ryngkat ki nongkitkam jong ka shnong Rangblang.