Shah khot biang u Palmer bad Alexander-Arnold ha ka kynhun England na ka bynta ka Nations League

LONDON, Nailur 19: U Cole Palmer bad u Trent Alexander-Arnold ki la shah khot biang ha ka kynhun ïalehkai jong ka England kaba don 27 ngut ki nongïalehkai na ka bynta ki jingïakhun jong ka Nations League ha u bnai Nailur bad Risaw.
Baroh ar ki dei napdeng ki katto katne ngut ki kyrteng ba pawkhmat kiba la shah iehnoh na ka kynhun ïalehkai jong ka England kaba ïashim bynta ha ka FIFA World Cup 2026.
Kumjuh ruh u Harry Maguire, u Luke Shaw bad u Phil Foden kiba la duh ïa ka World Cup, sa shisien pat kim shym la shah kynthup ha kane ka kynhun.
U Rio Ngumoha, rangïalehkai ba dang 18 snem jong ka Liverpool, u la shah kynthup lang ryngkat u Alex Scott-rangïalehkai pdeng jong ka Bournemouth bad u Dominic Calvert-Lewin-rangïalehkai ba shakhmat jong ka Leeds United.
Ka England kan ïakhun pyrshah ïa ka lahduh jong ka World Cup ka Spain, ka Croatia bad ar tylli ki jingïalehkai pyrshah ïa ka Czech Republic ha ka FIFA International window ba nyngkong jong ka samoi.
Ka England ka la pyndep ha ka kyrdan ba lai ha ka World Cup, kaba dei ka kyrdan kaba bha tam jong ka naduh ba ka la jop ïa kane ka lympung ha u snem 1966. Hynrei, u Thomas Tuchel u la shah kynthoh halor ka jingshim rai jong u ha ka semifinal pyrshah ïa ka Argentina, ha kaba ka England ka la lamkhmat da 1-0 haduh ka minit kaba 85 shuwa ba khatduh kan shah rem noh da 2-1 kol.
Ka thup kyrteng ki nongïalehkai ka England:
Rangap-kol: Jordan Pickford, Jason Steele, James Trafford
Rangap-dien: Trent Alexander-Arnold, Jarrad Branthwaite, Trevoh Chalobah, Marc Guehi, Lewis Hall, Ezri Konsa, Tino Livramento, Nico O’Reilly, Jarell Quansah
Rangïalehkai-pdeng-Madan: Elliot Anderson, Jude Bellingham, Myles Lewis-Skelly, Kobbie Mainoo, Cole Palmer, Declan Rice, Alex Scott
Rangïalehkai-ba-Shakhmat: Harry Kane, Dominic Calvert-Lewin, Eberechi Eze, Anthony Gordon, Rio Ngumoha, Marcus Rashford, Morgan Rogers, Bukayo Saka