Ym pat ngeit ïa ka jingpynksan halor ka UCC tad haduh ban da mih ka notification: Bah A.L.Hek

Shillong, Nailur 15 : U MLA ka BJP na Pynthorumkhrah, u bah AL Hek, u la ong ba ym lah ban ngeit pura ïa ka jingong ba ki jylla riewlum, kynthup ïa ka Meghalaya, kin lait na ka Uniform Civil Code (UCC) tad haduh ba ka Centre ka pynmih ïa ka notification.
Haba kren bad ki lad pathai khubor, u Bah AL Hek u la ong ïa kane haba kylli la ka Meghalaya bad kiwei ki jylla riewlum kin shah pyllait neem na ka UCC.
“Bun ki briew ki ong ba yn ym pyntreikam ïa ka UCC ha ki jylla riewlum. Lada ka long kumta, ka biang. Hynrei haduh mynta ngam pat ngeit ïa kata tad haduh ba nga ïohi ïa ka notification,” ong u Bah AL Hek.
Shuh shuh u la ong ba ka jingpynshai kaba khatduh lah ban ai tang hadien ba la ïohi ïa ka notification jong ka sorkar.
“Ngin peit ïa ka notification bad ïa kaei kaba ka ong. Lada la pynshai lypa ba yn ym pyntreikam ïa ka UCC ha ki jylla tribal, te ka mut ba la pyllait lypa. Ngam kwah ban ong mynta la nga ngeit ne ngam ngeit. Ngin ap shwa ïa ka notification ,” u la ong.
U Bah Hek u la kdew ruh ba ki don ki jingïathuh kiba ïapher kiba dang saphriang ha social media halor kane ka mat.
U la ong ba haduh mynta ym pat shai la kine ki jingïathuh ki long kiba shisha ne em. Ha social media, don kiba ong ba Amit Shah u la ong ba baroh 21 tylli ki jylla ba synshar da ka BJP kin pyntreikam ïa ka UCC.