Pynkynriah tang kiba dang trei ha ki tnad sorkar bapher bapher na Them ïew Mawlong: Hek

Shillong, Nailur 15: U nongïalam ka Meghalaya Bharatiya Janata Party (BJP) uba dei ruh u MLA ka Pynthorumkhrah constituency Bah AL Hek u la ong ba ka jingthmu ban pynkynriah ïa ki 342 tylli ki longïing na Them ïew Mawlong ka dei ban long thik tang ïa ki ba dang trei ha ki tnat treikam Sorkar katba ïa ka Gurudwara ym dei ban pynkynriah kum ka jingburom markylliang ïa ka niam bad jingngeit.
U Bah Hek u la ïathuh ba u la dep rah teng ïa kane ka mat naduh ka por ba dahg long Myntri Rangbah u Dr Mukul Sangma.
“Naduh kham mynshwa, shwa ka Sorkar ba la ïalam da u Conrad K Sangma, ha ka por jong ka Sorkar u Dr Mukul ruh nga la rah ïa kane ka mat. Ha ka por jong u Conrad ruh, nga la ïai bteng ban tynruh ba dei ban pynkynriah noh ïa ki ba sah ha Them ïew Mawlong” la ong u Hek.
U Bah Hek ula pynkynmaw ba haka por ba u bat kum u Myntri ka tnat ka Koit ka Khiah, u la tyrwa ban ai jaka sah ïa ki nongtrei ka tnat kiba sah ha Them ïew Mawlong ha ki jaka sah (Quarter) jong ka tnat.
“Kito kiba trei ha ki tnat Sorkar kum ha ka Municipal, ka tnat ka Koit ka Khiah bad ki tnat bapher bapher. Ha ka por ba nga dang long Myntri ka tnat ka Koit ka Khiah, nga la ong aiti noh ha nga ïa baroh kito ki nongtrei kiba trei ha ka tnat ka Koit ka Khiah, ngin ai jaka sah ïa baroh kiba sah ha Them ïew Mawlong. Ngi la long kiba la khreh ha kito ki por bad ngi la long kiba la khreh wat mynta ruh” u la ong.
Halor ka jaka mane blei kaba don ha Them ïew Mawlong, u Bah Hek u la ong, “Lada ki ong ba ki kwah ban kynriah, ngim kwah ban kynriah ïa ka Gurudwara. Ka jaka mane ka dei ka jaka mane. Ngi dei ban burom ïa kawei pa kawei ka jingngeit. Lada u Hindu u don la ka jong ka jingngeit, ngi hap ban burom, la ka long Khristan ne Muslim, ngi hap ban burom ïa kata ka jingngeit baroh.”
U Bah Hek u la ong ba ka BJP ka kloi ban ïarap ïa ka Sorkar Jylla ban ïoh jaka na ka Ministry of Defence ban ïoh jaka ban pynkynriah ïa ki briew na Them ïew Mawlong hynrei ka pyrshah pat ban ai jaka sah ïa ki briew ki bym don ki nongtrei jong ki tnat treikam Sorkar.
“Ngin ïarap ruh ïa ka Sorkar ban ïoh jaka na ka Ministry of Defence ka Sorkar Pdeng. Dei ban ai jaka ban pynsah ïa ki, hynrei ki dei ban long tang kiba dang dei ki nongtrei ha ki tnat treikam Sorkar. Kam lah ban long ïa kito ki bym dei ki nongtrei Sorkar ban dawa jaka sah na ka Sorkar, ngin nym pdiang ïa kata. Lada ai jaka, ka dei ban long tang na ka bynta kito kiba dang don ha ka kam Sorkar” u la bynrap.